Memlekettik qyzmet isteri agenttigi óz jobalaryna belsendi azamattyq ustanymy bar jastardy tartpaq
ASTANA. QazAqparat - Memlekettik qyzmet isteri agenttigi óz jobalaryna belsendi azamattyq ustanymy bar jastardy tartady. Bul týraly búgin Halyqaralyq jemqorlyqpen kúres kúnine arnalǵan 1-shi jastar forýmynda QR Memlekettik qyzmet isteri jáne sybaılas jemqorlyqqa qarsy is-qımyl agenttigi tóraǵasynyń orynbasary Alık Shpekbaev aıtty.
Onyń atap ótýinshe, agenttik saıasaty jemqorlyqtyń tamyryna balta shabý jumystaryna jastardy barsha tartýǵa baǵyttalǵan.
«Agenttik óziniń jobalar men bastamalaryna belsendi azamattyq ustanymy bar adamdardy tartýǵa nıettenip otyr», - degen ol Qazaqstannyń jańa jemqorlyqqa qarsy strategııasyn júzege asyrýdyń basty sharty memleket pen qoǵamnyń kúsh-jigerin toptastyrý ekendigin basa aıtty.
«Budan bólek, jemqorlyqqa qarsy saıasattyń tabysty júzege asyrylýy jemqorlyqtyń aldyn alýdaǵy júıeli sharalarǵa baılanysty. Onyń negizgi quraldary oqý jáne aǵartý isi ekendigi sózsiz. Sondyqtan da agenttik ártúrli maqsatty aýdıtorııaǵa arnalǵan oqytý baǵdarlamalarynyń jobasyn ázirledi», - dedi Á.Shpekbaev.
