Memlekettik qyzmet alýshylardan shaǵym azaıar emes - Darhan Jazyqbaev
«Jyldan jylǵa memlekettik qyzmet kórsetý salasy, onyń sapasy men qoljetimdiligi azamattardyń jeke tájirıbesi negizinde memlekettik apparatqa qatysty senimin qalyptastyratyn quralǵa aınalyp keledi. Bıylǵy jartyjyldyqta 74,3 mln-nan astam memlekettik qyzmet kórsetildi, onyń basym bóligi, ıaǵnı 73,3 mln-y elektrondy nysanda. Bul 98,6 paıyzdy quraıdy. Degenmen, bizdiń basty maqsatymyz – tsıfrlandyrý úrdisi ońtaıly jolǵa qoıylmaı otyr. Sońǵy 6 aı ishinde 431 tekserý uıymdastyrylyp, 29 myń zańbuzýshylyq anyqtaldy. Qyzmet alýshylardan keletin shaǵymdar azaıar emes. Dál qazirgi sáttiń ózinde qaralyp jatqan shaǵymdardyń sany 100-den asady», - dedi Darhan Jazyqbaev agenttikte ótken konsýltatsııalyq-saraptama tobynyń otyrysynda.
Onyń atap ótýinshe, shaǵymdardyń sebebi Úkimetke usynylǵan.
«Búgingi kúni adamdardyń qatysýynsyz atqarylatyn elektrondyq qyzmetterdiń úlesi 4 paıyz ǵana. Qalǵan qyzmetter elektrondy nysanda tek ótinish berý nemese onyń nátıjesin alýmen ǵana shektelgen. Al barlyq ishki protsester qyzmetshilerdiń moınynda. Odan bólek, shaǵymdardyń sebebi - keı qyzmetterdiń tolyqqandy emes, jartylaı bolatyndyǵyna qatysty. Búgingi tańda 1 323 memlekettik qyzmetti kórsetý rásimi shamamen 400-den astam zańǵa táýeldi aktilerde, sondaı-aq salalyq zańdarda aıqyndalady. Osy zańdardy qarapaıym qyzmet alýshy túgili kásibı mamandarǵa uǵyný qıynǵa soǵady. Mundaı jaǵdaıda olarda birizdendirý asa ózekti», - dedi agenttik basshysy.
