Memlekettik qyzmet agenttiginiń tóraǵasyna kez kelgen azamat tikeleı shyǵa alady
ASTANA. QazAqparat - Memlekettik qyzmet isteri jáne sybaılas jemqorlyqqa qarsy is-qımyl agenttiginiń tóraǵasy Alık Shpekbaevqa kez kelgen qazaqstandyq kez kelgen ýaqytta áleýmettik jeli arqyly tikeleı baılanysqa shyǵa alady. Bul týraly OKQ-da ótken baspasóz máslıhatynda Agenttiktiń qoǵammen baılanys jónindegi departamentiniń dırektory Arman Berdalın málim etti, dep habarlaıdy QazAqparat tilshisi.
«Agenttiktiń janynan arnaıy monıtorıngtik toptyń qurylǵandaǵy maqsaty - bul eń aldymen qoǵamnyń kózimen «Memlekettik qyzmette qandaı kemshilikter ketip jatyr? Jemqorlyqty qaıtsek jeńýge bolady?» degen suraqtarǵa jaýap izdeý. Biz Qazaqstannyń barlyq óńirlerin aralap shyqqan bolatynbyz. Biraq, bul jerde aıta ketý kerek, tek oblys ortalyqtaryn ǵana emes, shalǵaıdaǵy jatqan aýdan-aýyldarǵa baryp, shamamyz kelgenshe sol kezdegi halyqtyń oı-pikirin tyńdap, ol jerdegi hal-ahýaldy kórip, olarǵa kórsetilip jatqan memlekettik qyzmet der kezinde sapaly jetip jatyr ma degen suraqqa jaýap izdedik», - deıdi ol.
Arman Berdalınniń aıtýynsha, qazirgi tańda memlekettik qyzmettiń kórsetilip jatqan 746 túri bar. Sonyń 70 paıyzdan astamy elektrondy túrde qoljetimdi bolyp otyr.
«Osynyń sapasy qandaı deńgeıde? Biz baqylaǵandaı talaı óńirlerde áli kúnge deıin ınternettiń jetispeýshiligi baryn kórip keldik. Al baıaǵydan bir qaǵazdy alý úshin aýdan ortalyǵy nemese oblys ortalyǵyna aqshasyn shyǵyndap, qansha adam kelip-ketip júrdi. Al qazir úıden shyqpaı-aq memlekettik qyzmetti 10-15 mınýttyń ishinde alýǵa múmkindik bar. Osyny halyq bile me, paıdalana alyp jatyr ma - osylardyń barlyǵyn baqylap keldik», - deıdi Arman Berdalın.
Departament basshysynyń aıtýyna qaraǵanda, arnaıy monıtorıngtik toptyń quramynda memlekettik qyzmetshiler joq.
«Onyń ishinde tek qoǵamdyq pikir qalyptastyratyn, qoǵamnyń belsendileri - ıaǵnı barmaq basty, kóz qysty bolmas úshin, «qarǵanyń kózin qarǵa shuqymaıdy» dep aıtqyzbas úshin eshkimge táýelsiz sarapshylardy biz Agenttiktiń quramyn tartyp, óńirlerdi aralap keldik. Aralap qana qoımaı, qazirgi tańda árbir aýdanda monıtorıngtik toptar bar ekenin aıta ketkimiz keledi. Olar biz kórip ketken kemshilikter men usynystarymyzdyń barlyǵyn nazardan shyǵarmaı, árqashan ákimdikterdiń nazaryna usynyp otyratyn bolady. Sondyqtan, eń aldymen halyqqa ashyq ekenimizdiń jetkizgimiz keldi», - deıdi ol.
Arman Berdalın, sondaı-aq, Memlekettik qyzmet isteri jáne sybaılas jemqorlyqqa qarsy is-qımyl agenttiginiń tóraǵasy Alık Shpekbaevqa kez kelgen qazaqstandyq kez kelgen ýaqytta áleýmettik jeli arqyly tikeleı shyǵa alatynyn eske saldy.
«Qazir Agenttiktiń tóraǵasy Alık Shpekbaevtyń Feısbýk jáne Telegram jelilerinde óziniń jeke paraqshalary bar. Kez kelgen qazaqstandyq kez kelgen ýaqytta óziniń tikeleı suraǵyn, eshqandaı adamsyz, bógetsiz sol kisige suraq qoıa alady. Odan bólek, qoǵamdyq baqylaý kartasy baryn atap ótkim keledi», - dedi ol.
