Memlekettik kvotamen EKU-ǵa bólinetin qarajatty qaıta qaraý kerek - sarapshy
ASTANA. QazAqparat - Qazaqstanda 2010 jylmen salystyrǵanda ekstrokorporaldy uryqtandyrýǵa bólinetin kvota kólemi 9 ese artty. Bul jaıynda QazAqparat tilshisine suhbat bergen elimizdegi eń birinshi ekstrokorporaldy uryqtandyrý zerthanasynyń negizin qalaǵan bıologııa ǵylymdarynyń doktory Saltanat Baıqoshqarova aıtty.
«Bedeýlikti emdeý salasyna memlekettik qoldaý turaqty túrde kórsetiledi. Bedeýlikti emdeý úshin dıagnostıkalaý, konservatıvti ári jedel emdeý - munyń barlyǵy kvtota arqyly tegin jasalady. Biraq, ekstrokorporaldy uryqtandyrý óte joǵary repordýktıvti tehnologııa sanalady. Onyń shyǵyny joǵary bolǵandyqtan 2010 jyldan beri kvota bólinip keledi. Alaıda, memleket qarajatymen barlyq qajettilikti jabý múmkin emes. Sonda da memleket 2010 jyly 100 kvota bólgen bolatyn. Al búginde kvota sany 9 ese artyp, aǵymdaǵy jyly 900-ge jetti», - dedi Saltanat Baıqoshqarova.
Onyń sózine qaraǵanda, árbir kvotaǵa shamamen 700 myń teńge bólinedi. Degenmen, búgingi kúni bul qarajat jetkiliksiz bolyp otyr.
«Atalǵan somanyń jartysy dári-dármekke ketedi. Bul qarajat tehnologııaǵa jetpeıdi. Óıtkeni, 8 jyldyń ishinde álemde tehnologııa ózgerip ketken. Negizinen kreokonservatsııa, segmentatsııa tsıkli júrgiziledi. ıAǵnı, bir tsıklde alynǵan jumyrtqa jasýshasyn bólý, bir-eki nemese 1 aıdan keıin uryqtardy aýystyrý qajet. Al oǵan qosymsha qarajat kerek. Sondyqtan qazir bólinetin qarajatty qaıta qarastyrǵan jón», - dedi ol.
