Memlekettik kúzet qyzmetine alynǵan jas sarbazdar áskerı ant qabyldady
Respýblıkamyzdyń ár aımaǵynan jınalǵan jastar áskerı qyzmet ótkerý jáne Otan aldyndaǵy konstıtýtsııalyq paryzyn oryndaý úshin áskerı ant qabyldady. Bul shara - áskerı qyzmetshilerdiń boıynda otansúıgishtik qasıetin tárbıelep, Otanyna jáne Qazaqstan Prezıdentine adaldyqqa úndep, sondaı-aq, Memlekettik kúzet qyzmeti qataryndaǵy sarbazdardyń boıynda áskerı mindet ótkerýdiń maqtanysh sezimin týdyratyn erekshe áskerı rásim.
Áskerı ant qabyldaý saltanatty is-sharasyna Nur-Sultan qalasy ákimdiginiń ókilderi, qoǵam qaıratkerleri, QR Memlekettik kúzet qyzmetiniń ardagerleri jáne sarbazdardyń ata-analary men jaqyndary shaqyryldy.
Іs-sharada jańa shaqyrylǵan sarbazdar qysqa ýaqyt aralyǵynda meńgergen daǵdylaryn kórsetti. Saptyq tásil elementterin kórsetip, saltanatty marshpen júrip ótti.
Prezıdenttik úrlemeli orkestr jáne Qurmet qaraýyl rotasy plats-kontserttiń jańa baǵdarlamasymen óner kórsetti.
Jas sarbazdar aldynda quttyqtaý sózdi Qazaqstan Respýblıkasy Memlekettik kúzet qyzmeti bastyǵynyń orynbasary – Aıryqsha maqsattaǵy kúshter Qolbasshysy, general-leıtenant Muhtar Aıýbaev sóıledi.
Áskerı ant qabyldaǵan soń sarbazdar Memleket basshysynyń jáne basqa da kúzetiletin tulǵalar men obektilerdiń qaýipsizdigin qamtamasyz etý boıynsha erekshe tapsyrmalardy oryndaýǵa kirisedi, rásimdik is-sharalardy oryndaýǵa qatysyp, Memlekettik Tý men Eltańba etalonyn qorǵap, shetel memleketteriniń basshylaryn qarsy alýǵa atsalysady.
Aıta keteıik, Memlekettik kúzet qyzmeti – Qazaqstan Respýblıkasynyń ulttyq qaýipsizdigin qamtamasyz etetin kúshterge jatatyn jáne kúzetiletin adamdar men obektilerdiń qaýipsizdigin qamtamasyz etý jónindegi kúzet is-sharalaryn Qazaqstan Respýblıkasynyń zańnamasynda belgilengen quzyret sheginde júzege asyratyn, Qazaqstan Respýblıkasynyń Prezıdentine tikeleı baǵynysty jáne esep beretin arnaýly memlekettik organ.
Qyzmet 2014 jyldyń 21 sáýirinde Qazaqstan Respýblıkasy Memlekettik kúzet qyzmeti men Respýblıkalyq Ulannyń qosylýynan quryldy.
QR Memlekettik kúzet qyzmetiniń bastyǵy - general-leıtenant Ánýar Sadyqulov.
