Memlekettik qýyrshaq teatry halyqaralyq festıvalge qatysady
ALMATY. QazAqparat – Memlekettik qýyrshaq teatry halyqaralyq festıvalge qatysady, dep habarlaıdy QazAqparat tilshisi.
«Eresekterge arnalǵan spektaklder sahnalaýdaǵy tájirıbesi kásibı mamandar tarapynan joǵary baǵalanyp kele jatqan teatr ujymy bıylǵy jyldyń ekinshi jartysynda qatarynan úsh teatr festıvalinde baq synamaqshy. Óner ordasynyń basty maqsaty – balalardy ǵana emes, eresekterdi de tylsymyn ishine búkken qýyrshaq ónerine qyzyqtyrý bolsa, sol mıssııasyn tek elimizde ǵana emes, shet elde de dáripteýdi jolǵa qoıyp otyr»,- dep habarlady teatrdyń baspasóz qyzmeti.
Qazaq qýyrshaq óneriniń múmkindigin tanytatyn alǵashqy óner dodasy halyqaralyq sarapshylar men teatr synshylarynyń basyn qosatyn «TeArt – kókshe» teatr festıvli bolsa, ekinshisi Qaraǵandy qalasynda alǵash ret ótetin «Syn – shyn bolsyn» respýblıkalyq teatrlar festıvali.
«Ońtústik astananyń mádenı deńgeıin odan ári arttyrý, qazaq óneriniń álem keńistiginde tanylýyna yqpal etý maqsatynda teatr ujymy attanatyn halyqaralyq «Ankara» qýyrshaq teatrlary festıvaliniń de mańyzy zor. Bıylǵy jyldyń qazan aıynda saltanat quratyn óner báıgesi Túrkııa memleketi, Ankara qalasynda ótpek. Teatr repertýaryna bıylǵy jyl qosylǵan eresekterge arnalǵan «Makbet.Illıýzııa» (rej. D.Jumabaeva) jáne balalarǵa arnalǵan «Úıshik» (rej.A.Zaıtsev) qoıylymdary sarapshylar men kórermender nazaryna usynylatyn bolady»,- dep atap ótti qýyrshaq teatry.
Aıta keteıik, óner dodalarynda baq synaıtyn eresekterge arnalǵan spektaklder ár jyldary otandyq jáne sheteldik teatr festıvalderinde kásibı teatr synshylary tarapynan joǵary baǵaǵa ıe bolyp, qýyrshaq teatrynyń múmkindigin tereń tanytyp kele jatqan kórkem týyndylar qatarynda.
