Memlekettik qupııa qujattar qalaı jetkiziledi

NUR–SULTAN. QazAqparat – Búgin elimizde feldegerlik qyzmet mamandary tól merekelerin atap ótýde. Atalǵan qyzmettiń memlekettik mańyzy zor. Olaı bolsa feldeger degen kim? Onyń mindeti qandaı? Feldeger bolý úshin qandaı qasıet talap etiledi? Osy jáne ózge de suraqtarǵa QR Memlekettik feldegerlik qyzmeti Túrkistan oblysy boıynsha basqarma basshysy Saparǵalı Sábıtov jaýap berdi, dep habarlaıdy QazAqparat tilshisi.

«Bizdiń mindet - memlekettik mańyzdy, qupııa qujattardy jetkizý. Kúnine 3-4 myń qujat tasımyz. ıAǵnı qujat tıisti jerge ýaqytyly ári bútindeı jetýi tıis. Bul komandalyq jumys jáne jumysqa kiriser aldynda nusqaýlyq beriledi. Óıtkeni, jaýapkershilik joǵary, feldegerler bireýdiń jeke zatyn emes, memlekettik qupııa sanalatyn qujatty jetkizedi. Sondyqtan biz tótenshe jaǵdaıǵa daıyn bolýymyz kerek. Bizdiń qyzmetkerler aptasyna 2 ret arnaıy daıyndyqtan ótedi», - dedi Saparǵalı Sábıtov.

Sondaı-aq, basqarma basshysy feldegerlerge qoıylatyn basty talaptarǵa toqtalyp ótti.

«Feldegerdiń joǵary bilimi bolýy qajet. Atap aıtqanda zań salasy boıynsha. Maman ózine júktelgen mindetke asa jaýapkershilikpen qaraýy tıis. Odan bólek, adam moraldyq jáne fızıkalyq turǵydan kez kelgen jaǵdaıǵa daıyn bolýy kerek. Óıtkeni, jolda túrli jaǵdaı bolýy múmkin, al ol qujatty aman saý jetkizýi — mindet. Árıne, jetkizý protsesi joǵary basshylyq arqyly baqylanady. Osy kúnge deıin bizdiń mamandar óz mindetterin múltiksiz atqaryp keledi», - deıdi ol.

Onyń aıtýynsha, feldegerlik qyzmet tikeleı memlekettik organdarmen jumys isteıdi. Onyń ishinde Úkimet, ishki jáne syrtqy ister mınıstrligi taǵy sol sııaqty.

«Men bul salaǵa 1980 jyly kelip, 2017 jylǵa deıin eńbek etip, zeınetke shyqtym. Oǵan deıin mılıtsııa bolyp jumys istedim. Biz Prezıdenttiń, Úkimettiń qujat, hattaryn tasımyz. ıAǵnı qujat aldymen Máskeýge jetkiziledi, odan ári shetel asady. Nege Máskeý arqyly deseńiz? Tikeleı jetkizý qymbatqa túsedi. Elimizde feldegerlik qyzmet qurylyp, jumysyn bastaǵaly jol-jónekeı qujat joǵalý nemese ýaqytyly jetpeý oqıǵasy bolǵan emes», - deıdi ardager feldeger Shaphat Bısalıev.

Buǵan deıin habarlaǵanymyzdaı búgin elordada feldegerlik qyzmet mamandary marapattaldy .