Memlekettik qorǵa 1 mln tonna astyq satyp alý bıýdjetke eleýli júkteme bolady

ASTANA. QazAqparat – Memlekettik qorǵa 1 mln tonna astyq satyp alý el bıýdjetine eleýli júkteme bolady. Bul jaıynda Premer-Mınıstr Álıhan Smaıylovtyń Májilis depýtattary saýalyna bergen jaýabynda aıtylǵan, dep habarlaıdy QazAqparat tilshisi.

«1 mln tonna astyqty ınterventsııalyq satyp alýdy júrgizý úshin respýblıkalyq bıýdjetten shamamen 100 mlrd teńge bólý qajet. Bul el bıýdjeti úshin eleýli júkteme bolady. Sonymen qatar, astyqty forvardtyq satyp alýdy qarjylandyrý kólemin ulǵaıtý maqsatynda Azyq-túlik korporatsııasynyń jarǵylyq kapıtalyn tolyqtyrýǵa respýblıkalyq bıýdjetten 70 mlrd teńge kóleminde qarajat tartý máselesi pysyqtalyp jatyr», - dep atap ótedi Úkimet basshysy jaýabynda.

Sonymen qatar, Premer-Mınıstr búgingi tańda agroónerkásiptik keshen salasyndaǵy barlyq baǵdarlama boıynsha 14 aýyl sharýashylyǵy taýarlaryn óndirýshi 1 597 mln teńgege óz mindettemelerin oryndamaǵanyn atap ótedi.

«Olarmen 2023 jyldyń naýryz aıynan mamyr aıyna deıin úsh bólikten turatyn qaryzdy óteý kestesimen kelisimder jasaldy», - dedi Álıhan Smaıylov.