Memlekettik qordan baspana alý úshin otbasyndaǵy bir adamǵa tıesili kiris 57 846 teńgeden aspaýy tıis - S. Nokın
ASTANA. 4 maýsym. QazAqparat - Memlekettik turǵyn úı qorynan baspana alǵysy keletin adamnyń kirisi otbasyndaǵy jan basyna shaqqanda 3,1 eń tómengi kúnkóris deńgeıi kórsetkishinen tómen bolýy kerek.
Bul týraly búgin Darıǵa Nazarbaevanyń tóraǵalyǵymen ótken QR Parlamenti Májilisiniń Áleýmettik-mádenı damý komıtetiniń keńeıtilgen otyrysynda QR Óńirlik damý mınıstriniń orynbasary Serik Nokın aıtty.
Vıtse-mınıstr 2012 jyldyń jeltoqsanynda ótken «Halyqty turǵyn úımen qamtamasyz etýdiń jaı-kúıi men perspektıvalary» parlamenttik tyńdaýynyń usynystaryn oryndaý barysymen, sonyń ishinde memlekettik turǵyn úı qorynan baspana alýǵa kezekte turǵan azamattardyń Biryńǵaı klassıfıkatory týraly túsinikteme berdi.
«Atalǵan klassıfıkatordyń negizin «Turǵyn úı qatynastary týraly» Zańda belgilengen normalar quraıdy. Osy normalarǵa sáıkes memlekettik turǵyn úı qorynan baspana beriletin azamattardyń sanattary belgilendi. Áleýmettik az qamtylǵan azamattardy kezekke turǵyzý kezinde olardyń tabystary naqtylanady. Olardyń bir aılyq tabysy otbasyndaǵy árbir adam basyna shaqqanda 3,1 eń tómengi kún kóris kóleminen, ıaǵnı 57 846 teńgeden aspaýy tıis», - dedi S. Nokın.
Onyń aıtýynsha, atalǵan klassıfıkator ákimdiktermen kelisilgen jáne ár toqsan saıyn jańartylyp otyrady.
