Memlekettik kompanııalardy jekeshelendirýdiń keshendi jospary naýryz aıynyń sońyna deıin qabyldanady
ASTANA. QazAqparat - Memleket basshysynyń tapsyrmasyn iske asyrý maqsatynda memlekettik múlikti jekeshelendirýdiń 2014-2016 jyldarǵa arnalǵan keshendi jospary ázirlenip, naýryzdyń sońyna deıin qabyldanatyn bolady. Jekeshelendirý jospary memlekettik menshiktiń quramyn jáne qurylymyn ońtaılandyrý baǵytynda memlekettik múlikti basqarý tıimdiligin arttyrý boıynsha júıeli sharalardy kózdeıtin bolady. Búgin Parlament Májilisindegi Úkimet saǵatynda Ekonomıka jáne bıýdjettik josparlaý mınıstri Erbolat Dosaev osylaı málim etti.
Mınıstrdiń aıtýynsha, memlekettiń ekonomıkadaǵy rólin azaıtý jáne memlekettik aktıvterdi basqarý tıimdiligin arttyrý basty mindetterdiń biri bolyp tabylady. Sonymen qatar, memlekettik aktıvterdi basqarý tıimdiligin arttyrý jáne memleket pen jeke bıznestiń ekonomıkadaǵy rólin naqty bólýdi qamtamasyz etý maqsatynda memlekettik jáne kvazımemlekettik kompanııalardy jekeshelendirý jalǵasady. Osy maqsatta úkimettik komıssııa qurylyp, memlekettik jáne kvazımemlekettik sektorǵa egjeı-tegjeıli taldaý júrgizilip jatyr. Memleket qatysatyn uıymdardy irikteý jáne básekeles ortaǵa berý boıynsha ádister ázirlengen.
«Qazirgi ýaqytta kvazımemlekettik sektor 6 963 uıymdy quraıdy, onyń ishinde memleket qatysatyn 398 memlekettik, 6 023 uıym kommýnaldyq menshikte bolyp tabylady. Ulttyq basqarýshy holdıngter, ulttyq kompanııalar aktıvteriniń qurylymyna 542 uıym kiredi. Búginde, 201 uıym men 70 beıindi emes obektini, onyń ishinde 10 - respýblıkalyq, 151 - kommýnaldyq menshikte bolyp tabylady. Holdıngterdegi 40 aktıvti jáne 70 obektini básekeles ortaǵa berý maquldandy jáne osy baǵytta jumys bastaldy», - dedi mınıstr E. Dosaev.
