Memlekettik kompanııa korporatıvtik naryqtyq qaǵıdattarǵa súıense onda problemalardy tabysty sheshýge bolady - N. Nazarbaev
«Dástúrli memlekettik basqarý jeke menshikpen salystyrǵanda tıimdirigi tómenirek dep sanaldy. Muny biz Keńes odaǵynyń «komandalyq basqarýy» ydyraǵannan keıin óz basymyzdan ótkerdik. Men keńestik kezeńdik júıede jumys isteı júrip, «sotsıalızmdi túzete otyryp, alǵa qaraı júre berýge bolady» degenge saıatyn Gorbachev reformasyn synaǵandardyń biri bolatynmyn. Tipti onyń «Sotsıalızm - adamı kelbetpen» degen sózi de bar edi. Muny eshkim de túsingen emes, buny negizinen ol ekonomıkaǵa jaqyndastyryp aıtqysy kelgen de shyǵar. Biraq, memlekettik kompanııa korporatıvtik naryqtyq qaǵıdattarǵa súıene otyryp jumys istese, onda problemalardy tabysty sheshýge bolatyn edi. Osyny eskergen joq», - dedi N. Nazarbaev.
Bul rette Prezıdent atalǵan máseleniń jarqyn mysaly retinde shyǵystaǵy kórshiles Qytaıdyń memlekettik kompanııalaryn atap ótti. «Bir kezderi Gorbachevtyń qaıta qurýlary bir orynda tabandap turyp, onyń eshqandaı da jetistigi bolmaıtyny ańǵaryla bastaǵanda, onyń janyndaǵy jaqyn adamdardyń biri bolatynmyn, maǵan kóp keńester berip, uzaq túsindirýge týra keldi. Men «aqyry eshqandaı baǵdarlama men strategııa bolmasa, Qytaıǵa qaralyq» dep keńes berdim. Óıtkeni, Qytaıda týra sol kezdegi Keńes odaǵyndaǵydaı memlekettik qurylym bolatyn, basshylyq kúsh kommýnıstik partııanyń qolynda boldy. Bul partııa tártiptiń naǵyz qańqasy (karkasy) ispettes edi. Osy arqyly Ortalyq komıtettiń qaýlysymen-aq Kompartııaǵa naryqtyq reforma júrgizýge buıyrsa, ol júrgiziletin edi. Tártip sondaı bolatyn. Buǵan ol (Gorbachev-avt.) kónbedi, Qytaı degen biz úshin kim degendeı boldy. Al shyndyǵynda, dál sol Qytaıda júrgizilgen reformalar jaqsy nátıje bergen bolatyn», - dedi N. Nazarbaev.
