Memlekettik komıssııa Qazaqstan halqy Assambleıasy jylyn ótkizý tujyrymdamasyn bekitti

ASTANA. QazAqparat - Búgin QR Memlekettik hatshysy Gúlshara Ábdiqalyqovanyń jetekshiligimen Qazaqstan halqy Assambleıasy jylyn uıymdastyrý jáne ótkizý jónindegi memlekettik komıssııanyń alǵashqy keńeıtilgen otyrysy ótti. Keńes otyrysyna komıssııa músheleri, Parlament depýtattary, memlekettik organ ókilderi, respýblıkalyq etnomádenı birlestikter basshylary, Qazaqstan halqy Assambleıasy ǵylymı-saraptamalyq keńesiniń músheleri qatysty.

Jıynda Qazaqstan Respýblıkasy Premer-Mınıstriniń orynbasary, Komıssııa tóraǵasynyń orynbasary B.Saparbaev, Qazaqstan Respýblıkasy Konstıtýtsııalyq Keńesiniń tóraǵasy, Komıssııa tóraǵasynyń orynbasary I.Rogov, Qazaqstan halqy Assambleıasy Tóraǵasynyń orynbasary, Qazaqstan halqy Assambleıasy Hatshylyǵynyń meńgerýshisi, Komıssııa tóraǵasynyń orynbasary E.Toǵjanov, Mádenıet jáne sport mınıstri A.Muhamedıuly, QR Prezıdenti janyndaǵy Ortalyq kommýnıkatsııalar qyzmetiniń basshysy E.Babaqumarov baıandama jasady.

«2015 jyl elimiz úshin aıtýly mereıtoılar jylyna aınalǵaly otyr. Memlekettik deńgeıde atalyp ótiletin merekelerdiń biri Qazaqstan halqy Assambleıasynyń 20 jyldyǵy bolmaq. Elbasynyń Jarlyǵymen kelesi jyly Qazaqstan halqy Assambleıasy jyly dep jarııalanyp, ony laıyqty uıymdastyrý jáne ótkizý boıynsha arnaıy memlekettik komıssııa qurylǵan bolatyn. Búgingi alǵashqy otyrystyń mańyzy zor. Aldymyzda úlken jaýapty kezeń tur. Mereıtoılyq sharalardyń joǵary deńgeıde, sapaly ótkizý bizdiń qabyldaǵan sheshimderimizge tikeleı baılanysty bolmaq», - dedi jıyndy ashqan Memlekettik hatshy Gúlshara Ábdiqalyqova.

Sonymen qatar, Memlekettik hatshy Úkimet tarapynan Qazaqstan halqy Assambleıasynyń jylyn jáne QR Konstıtýtsııasynyń 20 jyldyǵyn uıymdastyrý jáne ótkizý jónindegi ulttyq is-sharalar jospary bekitilgenin atap ótti.

Jıyn barysynda Memlekettik komıssııa músheleri uıymdastyrýshylyq-ádistemelik birizdilikti qamtamasyz etýge jáne barlyq is-sharalardy úılestirýge baǵyttalǵan Qazaqstan halqy Assambleıasy jylyn ótkizý tujyrymdamasyn bekitti. Budan bólek, otyrysta QHA jylynyń emblemasy, QHA 20 jyldyǵyna arnalǵan mereıtoılyq medal skızderiniń úlgileri de bekitildi.

Budan bólek, QR Konstıtýtsııasynyń 20 jyldyǵyn, Qazaq handyǵy qurylǵanynyń 550 jyldyǵyn, Jeńistiń 70 jyldyǵyn qosa alǵanda, 2015 jylǵa arnalǵan mereıtoılyq is-sharalardyń josparyn iske asyrý boıynsha memlekettik organdardyń jumysyn úılestirý máseleleri talqylandy.

Jıyn qorytyndysy boıynsha Memlekettik hatshy birqatar naqty tapsyrmalar júktedi.