Memlekettik qoldaýdyń artqanyna qaramastan agrarlyq sektor áli de básekege qabiletsiz bolyp otyr

 Bul týraly búgin QR Parlamenti Májilisinde ótken Úkimet saǵatynda Aýyl sharýashylyǵy mınıstri Aqylbek Kúrishbaev málim etti, dep habarlaıdy QazAqparat.  

Mınıstrdiń aıtýynsha, qarjylyq daǵdarysqa qaramastan elimizde agroónerkásip keshenin sýbsıdııalaý aýqymy qysqarǵan joq, kerisinshe 3 paıyzǵa artyp otyr. Máselen, egis jumystary men jıyn-terim naýqany úshin bıýdjet pen Ulttyq qor qarajaty esebinen 82,6 mlrd. teńgeniń jeńildetilgen nesıeleri usynylǵan.

«Degenmen de, memlekettik qoldaý sharalarynyń arta túsýine qaramastan ekonomıkanyń agrarlyq sektory áli de básekege qabilettiligi álsiz sala bolyp otyr. Buǵan eńbek ónimdiliginiń tómendigi, ónimniń ózindik qunynyń joǵarylyǵy, óndiristiń usaq taýarlarǵa negizdelýi men saladaǵy tehnıkalardyń, tehnologııalyq qamtamasyz etýdiń artta qalýy sebep bolyp otyr. Máselen, ósimdik sharýashylyǵy dıqanshylyq salasy zamanǵa saı órleı almaı otyr. Mıneraldy tyńaıtqyshtar, ósimdikti qorǵaýdyń hımııalyq zattary az paıdalanylady. Sonyń saldarynan soltústik oblystarda ortasha egin ónimi gektaryna 15 tsentner bolýdyń ornyna 10-11 tsentnerdi ǵana qurap otyr. Elimizdiń negizgi astyq sebetin óńirlerinde astyq daqyldarynyń úlesti salmaǵy 87 paıyzdy qurap otyr. Al bul mólsherdiń 50-60 paıyz bolý qajettigi ǵylymı negizdelgen bolatyn. Sondyqtan da, óńirlerde astyqty shamadan tys ósirý etek alyp, ol bitik shyqqan jyldary satý máselesi qıyndap ketedi», dedi mınıstr.