Memlekettik qoldaýdyń arqasynda qus sharýashylyǵy órkendep keledi
ASTANA. QazAqparat - Qazaqstanda memlekettik qoldaýdyń arqasynda qus sharýashylyǵy qaıta damyp kele jatyr. Mundaı pikirdi búgin Qazaqstan qus ósirýshileri odaǵynyń jyl saıynǵy esepti kezdesýinde odaq prezıdenti Rýslan Sháripov bildirdi, dep habarlaıdy QazAqparat.
«Artqa kóz salar bolsaq, onda otandyq qus sharýashylyǵy qaıta damyp kele jatyr dep nyq senimmen aıtýǵa bolady. Máselen, sońǵy 6 jyldyń ishinde qus etin óndirý kólemi 67 paıyzǵa, taýarlyq jumyrtqa óndirisi 78 paıyzǵa artyp, qus sany 87 paıyzǵa kóbeıdi. Aǵymdaǵy jyly jalpy qus eti óndirisiniń kólemi 203 tonnany quraıdy dep kútilýde. Onyń 193 myń tonnasyn qus fabrıkalary óndiretin bolady», - dedi ol.
Onyń paıymynsha, qus sharýashylyǵyndaǵy óndiris kóleminiń artýyna memlekettik qoldaý óz septigin tıgizip otyr. Buǵan qosa, bıznes te bul salaǵa qarjy quıa bastady.
«Sońǵy jyldary ishinde memlekettik qoldaý kólemi 18 ese ulǵaıdy. Memleket tarabynan kórsetilip otyrǵan bul qoldaý sharalary qus ósiretin sharýashylyqtar sanynyń artýyna da sebepker boldy», - dedi Sháripov.
Sonymen qatar ol óz sózinde qus sharýashylyǵynda oryn alyp otyrǵan birqatar túıtkilderge de toqtalyp ótti. Máselen, keıbir qus sharýashylyqtarynda ınkýbatsııalyq jumyrtqa men táýliktik balapandardyń tapshylyǵy baıqalady.
