Memlekettik qoldaý sharalaryn monıtorıngteý júıesi ázirlendi

NUR-SULTAN. QazAqparat – Kásipkerlerge berilgen qarajatty tıimdi paıdalanýǵa múmkindik beretin «Skorıng» quraly engiziledi. Bul týraly Úkimet otyrysynda QR Qarjy vıtse-mınıstri Erjan Birjanov aıtty, dep habarlaıdy QazAqparat tilshisi.

«Mınıstrlik bólinetin memlekettik qoldaý sharalaryn monıtorıngteý júıesin ázirledi. Tıimdilikti baǵalaýdyń jańa ádistemesi bekitildi. Ol memlekettik qoldaý alǵan sýbektilerge memlekettiń qoldaýynsyz damyp kele jatqan sýbektilermen salystyrmaly taldaý júrgizýge múmkindik beredi», - dedi ol.

Vıtse-mınıstrdiń atap ótýinshe, «Skorıng» (qaryz alýshynyń kredıtke qabilettiligin baǵalaý ádisi) quraly iske asyrylatyn bolady. Onyń nátıjelerin memlekettik qoldaý kórsetý kezinde paıdalaný josparlanyp otyr.

«Bul kásipkerlerdi qarjylyq qoldaýǵa baǵyttalǵan qarajatty neǵurlym tıimdi paıdalanýǵa múmkindik beredi. Osylaısha, salyq tóleý, jumys oryndaryn ulǵaıtý nemese jalaqy qory boıynsha oń kórsetkishteri bar bızneske qoldaý jasalatyn bolady», - dedi Erjan Birjanov.