Memlekettik qoldaý sharalary 744 myńnan astam adamǵa kórsetildi

ASTANA. QaAqparat - «Jumyspen qamtý 2020 jol kartasy» baǵdarlamasy iske asyrylǵan ýaqyttan beri, ıaǵnı 2011 jyldan 2016 jyl aralyǵynda memlekettik qoldaý sharalary 744 myńnan astam adamǵa kórsetildi. Bul týraly búgin Parlament Májilisindegi Úkimet saǵatynda QR Densaýlyq saqtaý jáne áleýmettik damý mınıstri Tamara Dúısenova málim etti, dep habarlaıdy QazAqparat.

 «Baǵdarlama iske asyrylǵan jyldar ishinde, ıaǵnı 2011 jyldyń 1 shildesinen memlekettik qoldaý sharalary 744 myńnan astam adamǵa kórsetilgen. Onyń ishinde 563 myń adam turaqty jumys oryndaryna jumysqa ornalasty. Osy jyldyń 9 aıynda baǵdarlamaǵa 146 myńnan astam adam tartyldy», - dedi Tamara Dúısenova.

Onyń sózine qaraǵanda, jumys kúshi quramynyń sapalyq ózgerisi jumyspen qamtylǵandardyń jalpy sany 6,3 paıyzǵa jáne jaldamaly jumyskerler sany 16,6%-ǵa óskenimen sıpattalady.

Mınıstr birinshi baǵytta qarastyrylǵan (jumyspen qamtýdy ınfraqurylymdy jáne turǵyn úı-kommýnaldyq sharýashylyqty damytý esebinen qamtamasyz etý) sharalar ekonomıkalyq daǵdarys kezinde álemdik tájirıbede ózin jaqsy jaǵynan kórsetken sharalardy kózdeıtinin atap ótti.

Vedomstvo málimetine qaraǵanda, 2016 jyly 5712 jobany iske asyrý josparlanǵan, onyń ishinde 3607 joba el táýelsizdiginiń 25 jyldyǵyna oraı Úkimettiń arnaıy rezerviniń qarajaty esebinen kózdelýde, osy jobalar turǵyndar jıynynyń sheshimi boıynsha eń shalǵaı aýyldarda iske asyrylady.

Jobalardyń negizgi bóligi - bul joldar men bilim berý nysandaryn jóndeý. Óńirler bólinisinde jobalardyń kóbisi Shyǵys Qazaqstan, Qaraǵandy, Soltústik Qazaqstan jáne Ońtústik Qazaqstan oblystarynda iske asady.

Kórsetilgen jobalarda 41 myńnan astam jumys oryndaryn qurý kózdelýde. Aǵymdaǵy jyly Baǵdarlamanyń birinshi baǵytyna barlyǵy 81,5 mlrd. teńge bólindi. Jumys kestesine jáne qarjylandyrý josparyna sáıkes, ákimdikter aǵymdaǵy jylǵy qarasha-jeltoqsan aılarynda bólingen qarjattardy tolyqtaı ıgeredi dep kútilýde.