Memlekettik kirister komıtetiniń qyzmetkerleri shekarada taýar tekseredi

ASTANA. QazAqparat - Búginde Reseı Federatsııasy men Qyrǵyzstanmen aradaǵy shekaranyń barlyq avtobeketterine 300-ge jýyq adam jiberildi. Olar eksportqa shyǵatyn jáne ımportpen keletin taýarlardy tekserip otyrady, dep xabarlaıdy QazAqparat tilshisi.

Komıtettiń eksporttyq baqylaý basqarmasynyń jetekshisi Ánýar Mádıevtiń aıtýynsha, kesheden beri 37 avtobekette 277 adam jumys istep júr. Olarǵa birneshe mindet júktelgen. Birinshiden, komıtet qyzmetkerleri eksporttyq baqylaýǵa jatatyn taýarlardy qadaǵalaıdy. Ekinshiden, bajdyń tómendetilgen mólsherlemesine kiretin taýarlardy tekseredi. Ondaı taýarlarǵa 3 myńǵa jýyq ónim kiredi. Úshinshiden, Eýrazııalyq ekonomıkalyq odaq aıasynda taýarlardy satý, jumystardy oryndaý jáne qyzmet kórsetý kezinde ımportqa qosylǵan qun salyǵynyń tolyq túsýin baqylaıdy.

«Budan bólek, búginde Qazaqstan aýmaǵynan avtokólikpen qara jáne tústi metaldardy shyǵarýǵa tyıym salynǵan. Memlekettik kirister komıtetiniń qyzmetkerleri osy máseleni de jiti qadaǵalap otyrady. Buǵan deıin biz Batys Qazaqstan oblysyndaǵy «Syrym» avtobeketinde pılottyq rejımde jumys istep kórdik. Sol kezde júk tasymaldaýshylar tarapynan narazylyq boldy. Sondyqtan aldaǵy ýaqytta túsinispeýshilikter bolmasyn dep, barlyq ımporttaýshylar men eksporttaýshylarǵa aldyn ala xabar bergimiz kelip otyr», - dedi Á.Mádıev Astanada ótken baspasóz máslıxatynda.

Onyń aıtýynsha, Memlekettik kirister komıtetiniń shtaty keńeıtilgen joq. Shekaraǵa jiberilgen barlyq qyzmetkerler komıtette jáne jergilikti jerde burynnan beri jumys istep júr.

«Osydan bastap Memlekettik kirister komıtetiniń qyzmetkerleri shekarada turaqty túrde jumys isteıtin bolady. Osyǵan oraı, jergilikti departamentterde eksporttyq baqylaý basqarmalary quryldy. Biz shtatty keńeıtken joqpyz», - dep atap kórsetti Á.Mádıev.