Memlekettik kirister komıteti jeltoqsannan bastap, veterınarlyq jáne fıtosanıtarlyq baqylaý qyzmetine kirisedi
ASTANA. QazAqparat - Aǵymdaǵy jyldyń jeltoqsan aıynyń ortasynan bastap, QR Memlekettik kirister komıteti veterınarlyq jáne fıtosanıtarlyq baqylaý qyzmetine kirisedi. Bul týraly búgin QR Qarjy mınıstrliginiń Memlekettik kirister komıtetine qarasty Kedendik baqylaý departamenti Ótkizý pýnkterin úılestirý basqarmasynyń bastyǵy Qaırat Maýbaev málim etti.
Onyń sózine qaraǵanda, EAEO-nyń kedendik shekarasyndaǵy ótkizý pýnktterinde kóliktik, veterınarlyq, fıtosanıtarlyq, sanıtarlyq-karantındik, kedendik, eksporttyq syndy baqylaý júzege asyrylady. al 2010 jylǵa deıin bul baqylaýlardy 4 memlekettik organ júzege asyryp kelgen edi. Keıinnen kóliktik baqylaý Memlekettik kirister komıtetine berildi. 2011 jyldyń ekinshi jartysynan komıtet sanıtarlyq-karantındik baqylaýdy júzege asyra bastady. 2014 jyly kedendik organdardyń avtomobıl ótkizý pýnkterine veterınarlyq jáne fıtosanıtarlyq baqylaýdy berý týraly zań qabyldandy. «Munyń barlyǵy pýnktten ótýdi jeńildetý úshin jasaldy. Endigi ýaqytta árbir memlekettik organdarǵa túrli ruqsat qaǵazdaryn alyp ótýdiń qajeti joq. Onyń barlyǵynan bir orynnan ótýge múmkindik jasaldy», - dedi ol. Onyń sózine qaraǵanda, qazirgi ýaqytta veterınarlyq jáne fıtosanıtarlyq baqylaýdyń tolyqtyǵy men tıimdiligin qamtamasyz etý úshin avtomobıl ótkizý pýnktteri qajetti tehnıkalyq quraldar men jabdyqtarmen jabdyqtaý júrgizilýde. Munan bólek, Aýyl sharýashylyǵy mınıstliginiń aýmaqtyq bólimshelerinde jumys isteıtin bilikti 90 mamanyn memlekettik kirister organdaryna qabyldaý sharalary qolǵa alynǵan.
