Memlekettik kirister komıteti taýarlardy qadaǵalaý tetigi týraly túsindirdi
Taýarlardyń jekelegen túrleriniń ótkizýin esepke alý jónindegi pılottyq joba taýarlardyń, onyń ishinde belgili bir elder kezeń-kezeńimen shekteýler engizetin taýarlardyń ımporty men eksportyna monıtorıngti júzege asyrýǵa baǵyttalǵan.
«Bizdiń negizgi seriktesterimizdiń biri retinde Reseı Federatsııasymen tyǵyz ekonomıkalyq qatynastarymyzdy eskere otyryp, pılottyq joba taýarlardy Reseı Federatsııasyna, sondaı-aq Belarýs Respýblıkasyna ótkizý kezinde monıtorıng júrgizýdi kózdeıdi. Jalpy, pılottyq jobalardy engizý tujyrymdamasy, eń aldymen salyqtyq ákimshilendirýdi jaqsartýdan jáne bıznes júrgizýdi ońaılatýdan turady. Mysaly, tabysty pılottyq jobalardyń qorytyndylary boıynsha salyq zańnamasyna elektrondyq shot-faktýralar, salyq mindettemeleriniń oryndalýy boıynsha azamattyq baqylaý, shaǵyn bıznes pen jeke tulǵalarǵa arnalǵan mobıldi qosymsha, temeki ónimderin tańbalaý jáne t. b. boıynsha normalar engizildi», - dep jazdy komıtetten.
Budan basqa, Qazaqstan Respýblıkasynda DSU-nyń alýlar tizbesindegi taýarlardy qadaǵalaý tetigi jumys isteıdi, onyń sheńberinde tizbeden EAEO elderine taýarlar eksporty kezinde EShF kýálandyrý kózdelgen.
«Bul tetik bizdiń EAEO boıynsha áriptesterimizdiń aldynda Qazaqstan Respýblıkasy alǵan mindettemelerdi oryndaý barysynda óziniń tıimdiligin kórsetti. Tutastaı alǵanda, taýarlardy ótkizý monıtorıngi bizge EAEO elderimen transshekaralyq saýda sheńberinde taýarlardy, onyń ishinde ýaqytsha shekteýler qoldanylatyn taýarlar boıynsha baqylap otyrýdy qamtamasyz etýge múmkindik beredi. Mysaly, bizde munaı ónimderin, astyqty, qara jáne tústi metall synyqtaryn jáne keıbir taýar pozıtsııalary boıynsha áketýge ýaqytsha shekteýler qoldanylady. Olarǵa qatysty shekteýler engizilmegen basqa taýarlar boıynsha erkin ótkizý júzege asyrylady, áketýge tyıym salý qaralmaıdy», - delingen vedomstvo habarlamasynda.
EAEO-nyń basqa elderi de olardyń aýmaǵynan belgili bir taýarlardy áketýge shekteýler engizýde. Mysaly, Reseı Federatsııasynda qant, astyq jáne basqa da taýarlardy eksporttaýǵa tyıym salynady. Bul sharalardyń barlyǵy memleketterdiń ekonomıkalyq qaýipsizdigin qamtamasyz etýge baǵyttalǵan jáne olardy EAEO elderi derbes qabyldaıdy.
Komıtettiń málimetinshe, qazirgi ýaqytta pılottyń jobasy boıynsha bıznes ókilderiniń qaraýynda jatqan birqatar eskertýleri men usynystary bar. Qaraý qorytyndysy boıynsha pılottyq jobany júrgizýdiń oryndylyǵy máselesi sheshiletin bolady, sondaı-aq másele barlyq múddeli memlekettik organdarmen kelisiledi.
«Reseı Federatsııasymen taýar aınalymyna keletin bolsaq, qańtar-mamyr aılarynda ótken jyldyń uqsas kezeńine qatysty aıtarlyqtaı aýytqýlar joq ekenin atap ótken jón. Bul rette tabıǵı ýran, bolattan jasalǵan tutas taptamaly dóńgelekter jáne dızel otyny sııaqty jekelegen taýar pozıtsııalary boıynsha, ıaǵnı eksport úshin dástúrli bolyp tabylatyn qazaqstandyq óndiristiń taýarlary boıynsha, onyń ishinde Reseıge eksporttyń ósýi baıqalady», - dep jazdy vedomstvo.
Osylaısha, taýarlardyń jekelegen toptarynyń Reseı Federatsııasyna eksportynyń ósýine qaramastan, jekelegen elder Reseı Federatsııasyna eksportqa shekteýler engizgen taýarlardy Qazaqstan Respýblıkasy arqyly keri eksporttaý faktileri baıqalmaıdy.
