Memlekettik kirister komıteti ortalyqtandyrylǵan esep júıesin engizedi

ASTANA. QazAqparat - Qazaqstan Respýblıkasynyń Memlekettik kirister departamenti derbes shottar úshin ortalyqtandyrylǵan esep júıesin engizip jatyr. Bul týraly QR QM Memlekettik kirister komıtetiniń ókili Jambyl Suraǵanov «Memleket pen bıznestiń seriktestigi» taqyrybynda ótken forýmda málim etti, dep habarlaıdy «QazAqparat» HAA tilshisi.

«Memlekettik kirister komıteti úsh qyzmetti biriktirdi. Olar Komıtettiń qaraýyna shamamen 17 aqparattyq júıeni alyp keldi. Aqparattyq júıelerdiń bári buryn bir-birimen baılanysta bolmaǵan. Búgingi tańda jańa aqparattyq júıe - derbes shottardyń ortalyqtandyrylǵan esebi qoldanysqa engizildi. Demek, salyq tóleýshilerdiń, ishki ekonomıkalyq salaǵa qatysýshylardyń, tutynýshylardyń birlesken qalyby qurastyryldy. Máselen, buryn kedende olar jeke tirkelip, jeke qujattar tapsyrylatyn. Oǵan deıin salyq organdarynda tirkelýge mindetteletin. Budan bylaı, jumystyń baǵyty ózgerdi. Bári de bir orynda bir derbes shot boıynsha atqarylady», - deıdi Jambyl Suraǵanov.

Onyń aıtýynsha, bul ózgeris bıznes úshin óte yńǵaıly bolatyn kórinedi.

«Bul baǵdarlama bıznes úshin óte yńǵaıly protseske aınalyp, tólemderdiń birden túsýine múmkindik beredi. Biz elektrondyq úkimettiń portalyna qosyldyq. Tólem banktiń alys nemese jaqyn ornalasqanyna qaraı 15 sekýndtyń, kóp degende 15 mınýttyń ishinde túsedi. Bul tuńǵysh aqparattyq júıe», - deıdi Jambyl Suraǵanov.