Memlekettik kirister komıteti «Qaplanbek» keden beketindegi jaǵdaıǵa alańdaýly

TÚRKІSTAN. QazAqparat – QR Qarjy mınıstrligine qarasty Memlekettik kirister komıteti Túrkistan oblysyndaǵy «Qaplanbek» keden beketinde birqatar kemshilikterdi anyqtady. Bul týraly Memlekettik kirister komıtetiniń baspasóz qyzmeti habarlady.

Baspasóz málimetterine qaraǵanda, Qazaqstan Respýblıkasy Saýda jáne ıntegratsııa vıtse-mınıstri Azamat Asqaruly, Qazaqstan Respýblıkasy Qarjy mınıstrligi Memlekettik kirister komıtetiniń tóraǵasy Marat Sultanǵazıevtiń memlekettik jergilikti basqarý organdarynyń basshylarymen jáne Ózbekstanǵa aǵash eksporttaýmen aınalysatyn tasymaldaýshylarmen jumys kezdesýi Túrkistan oblysynyń «Qaplanbek» keden beketiniń aýmaǵynda ótti.

Jıynda buǵan deıin buqaralyq aqparat quraldarynda jarııalanǵan tasymaldaýshylardyń narazylyǵyna qatysty, naqtyraq aıtqanda kólikterdiń turaqtarda uzaq turýy, keden organdarynyń is-áreketterine qatysty máseleler talqylandy.

«Qaplanbek» keden beketiniń aýmaǵynda jumys isteıtin jeke avtoturaqty tekserý kezinde onda qajetti ınfraqurylym, tamaqtaný pýnktteri, turý jáne avtokólikterge qyzmet kórsetý stantsııalary joq ekendigi anyqtaldy.

Tasymaldaýshylarmen áńgimelesý kezinde avtokólikterdiń toqtap qalýynyń naqty sebepteri kóbine kólik ıelerinń taýar tasymaldaý qujattarynyń bolmaýynan, avtokólikterdiń avtoturaqtan shyǵý kezindegi qozǵalystyń durys uıymdastyrylmaǵany belgili boldy.

«Jibek joly», «Atameken», «B.Qonysbaev», «Qazyǵurt» ótkizý beketterinde de osyǵan uqsas máseleler bar.

Kezdesýdiń qorytyndysy boıynsha, Túrkistan oblysy boıynsha Memlekettik kirister departamentine ótkizý pýnktteriniń ótkizý qabiletin arttyrý, sonyń ishinde kedendik rásimderdi jedeldetý boıynsha jedel sharalardy qabyldaý tapsyryldy. Zańsyz kásipkerlik qyzmet úshin avtoturaqtarǵa qatysty tekserý jumystary júrgizilmek.

Óz kezeginde, Túrkistan oblysynyń ákimdigine kólik turaqtaryn uıymdastyrý, kerekti áleýmettik-turmystyq jaǵdaılardy jasaý boıynsha usynystar berildi.