Memlekettik kirister komıteti: Aıyppul týraly jalǵan habarlamadan saq bolý kerek

ASTANA. QazAqparat - Qazirgi kezde messendjerler arqyly jeke tulǵalarǵa salyqty ýaqtyly tólemegeni úshin aıyppul salynatyny týraly habarlamalar taralýda, dep habarlaıdy QazAqparat tilshisi QR Qarjy mınıstrligi Memlekettik kirister komıtetiniń baspasóz qyzmetine silteme jasap.

«QR QM Memlekettik kirister komıteti taratylyp otyrǵan habarlamalardyń shyndyqqa janaspaıtynynyn málim etti. QR ÁQBjQ týraly kodeksinde múlik salyǵyn, jer salyǵyn jáne kólik salyǵyn ýaqtyly tólemegeni úshin jeke tulǵalardyń ákimshilik jaýapkershiligi kózdelmegen. Salyqtardy ýaqtyly tólemegen jaǵdaıda aıyppuldyń alynatyny týraly eske salamyz. Sonymen qatar, 2018 jyly jeke tulǵalardyń múlik salyǵyn, jer salyǵyn tóleý merzimi - 2019 jylǵy 1 qazanǵa deıingi ýaqyt. Osy jyly 2017 jylǵa eseptelgen salyqtar boıynsha tólem jasaý qajet», - delingen habarlamada.

Komıtet 2018 jylǵy kólik salyǵyn tóleýdiń sońǵy merzimi - 2018 jyldyń 31 jeltoqsany ekenin eske salady.

«Salyq bereshekteri paıda bolǵan jaǵdaıda kelesi sharalar qoldanylatyny týraly esterińizge salamyz. Salyq kodeksiniń 24-babyna sáıkes 2018 jyldyń 1 shildesinen bastap bankter salyqtyq bereshegi, áleýmettik tólemder boıynsha bereshegi bar salyq tóleýshige banktik shotty ashýdan bas tartýǵa mindetti. Osy norma zańdy tulǵalarǵa jáne jeke kásipkerlerge, sondaı-aq jeke tulǵalarǵa taraıdy. Eger bereshek 1 AEK (2405 teńge) mólsherinen asatyn bolsa, habarlama tabys etilgen kúninen 30 jumys kún ótken soń salyqtyq bereshekti tólemegen jaǵdaıda salyq organy salyqtyq buıryq shyǵarady jáne ony oryndaý úshin sot oryndaýshyǵa joldaıdy», - dep eskertedi komıtettiń baspasóz qyzmeti.

Budan keıin salyqtyq bereshekti óndirip alý sharalaryn sot oryndaýshy zań sheńberinde júzege asyrady.

«QR-dan shyǵýyn ýaqytsha shekteý týraly qaýly atqarýshylyq qujattyń mazmunynda 20 AEK-ten (48 100 teńgeden) astam somadaǵy talaptardy boryshker oryndamaǵan kezde sot oryndaýshysymen shyǵarylady. Sot oryndaýshylarmen Qazaqstannan shyǵýyn ýaqytsha shekteý týraly qaýly shyǵarylǵan boryshkerler tizimi Ádilet mınıstrliginiń saıtynda ornalasady. 2018 jyldyń 1 qańtarynan bastap Joǵarǵy sottyń usynysy boıynsha salyq organdarynyń talaptarynyń daýsyzdyǵyn eskere kele, salyq organynyń jeke tulǵanyń múlki esebinen salyq bereshegi somasyn óndirip alý týraly sot buıryǵyn shyǵarý týraly ótinishpen nemese talap qoıýmen sotqa júginýi alynyp tastalǵan. Bul rette salyq tóleýshige tıisti habarlama joldanady, al salyq bereshegin ótemegen jaǵdaıda sot oryndaýshyǵa májbúrlep oryndaý úshin tabys etiletin salyq buıryǵy shyǵarylady», - delingen habarlamada.