Memlekettik kirister departamentiniń para alǵan qyzmetkeri jeńil jazamen qutyldy
KÓKShETAÝ. QazAqparat - Aqmola oblysynda 3 mıllıon teńge paramen ustalǵan memlekettik kirister departamentiniń 36 jastaǵy bas mamanyna qatysty sot úkimi shyqty, dep habarlaıdy QazAqparat tilshisi.
Aqmola oblystyq sotynyń baspasóz qyzmetiniń deregi boıynsha 2017 jyldyń 15 qarashasynda Kókshetaý qalasynda tústi metalldardy eksportqa shyǵarýmen aınalysatyn kompanııanyń basshysynan para alǵan Aqmola oblysy boıynsha memlekettik kirister departamenti ekonomıkalyq tergeý qyzmetiniń bas mamany, aǵa ofıtser B.Baıakenov ustalǵan bolatyn.
Sotta anyqtalǵandaı qyzmettik mindetin asyra paıdalanǵan ekonomıkalyq tergeý qyzmetiniń bas mamany atalmysh JShS dırektorynan tústi metalldy eksportqa shyǵarýǵa ruqsat beretin lıtsenzııany zańsyz talap etken. Ol bolmaǵan jaǵdaıda QR QK-niń 214-baby (zańsyz kásipkerlik qyzmet, zańsyz banktik nemese kollektorlyq qyzmet) boıynsha qylmystyq jaýapkershilikke tartylatynyn, óz erkimen memleketke shyǵyndy ótegen kezde 5 myń aılyq eseptik kórsetkish boıynsha aıyppul tóleıtini nemese 5 jylǵa bas bostandyǵynan aıyrylatynyn aıtyp qorqytyp, 5 mıllıon teńge aqsha bopsalaǵan.
Artynsha ony JShS dırektorynan 3 mıllıon teńge aqshany qolma qol alǵanda sátinde Aqmola oblysy boıynsha Memlekettik qyzmet isteri jáne sybaılas jemqorlyqqa qarsy is-qımyl departamentiniń qyzmetkerleri ustady.
Kókshetaý qalalyq soty aıyptalýshy B.Baıakenovti QR QK 24-babynyń 3-bóligi, 190-babynyń 3-bóligi 1,2 tarmaqshasy boıynsha jasaǵan qylmystary úshin kináli dep tanyp, 4 jylǵa probatsııalyq baqylaý belgiledi.
