Memlekettik kiris komıtetiniń aýdandyq bólimshelerinen baqylaý qyzmeti alynady
ASTANA. QazAqparat - Memlekettik kiris komıtetiniń aýdandyq bólimshelerinen baqylaý qyzmeti alynady. Bul týraly búgin QR Qarjy mınıstrligi Memlekettik kiris komıteti qyzmetiniń tusaýkeserine arnalǵan dóńgelek ústel otyrysynda atalǵan vedomstvo basshysy Dáýlet Erǵojın málim etti.
«Ideıanyń týyndaǵan sátinen bastap salyq jáne keden qyzmetteriniń is júzinde qosylýyna deıingi kúrdeli jumystar júrgizildi. Túgendeýge atalǵan qyzmetterdiń barlyq aspektileri ilikti»,- dedi ol.
Sonymen qatar komıtet basshysynyń sózine qaraǵanda, «DoingBusiness» reıtıngisinde joǵary pozıtsııalarǵa ıe Danııa, Ulybrıtanııa, Nıderlandy, Germanııa, Avstrııa, Fınlıandııa, Ispanııa, Vengrııa, Estonııa, Latvııa, Grýzııa elderindegi memlekettik kiristerdi tıimdi ákimshilendirýdiń halyqaralyq tájirıbeleri zerdelengen.
«Halyqaralyq tájirıbe negizinde Memlekettik kiris komıtetiniń qurylymy ázirlendi. Іs júzinde bul qarapaıym úsh satyly qurylym: Ortalyq - Oblys - Aýdan. Biraq jańa fýnktsıonaldy mindetteri bar. Aýdandyq deńgeıdegi bólimsheden baqylaý qyzmeti alynyp, tek salyq tóleýshilerge servıstik qyzmet kórsetý fýnktsııasy qalady», - dedi D.Erǵojın.
Komıtet basshysynyń atap ótýinshe, vedomstvonyń qosalqy bólimsheleri ońtaılandyrylyp, bıznes-protsesterdi qaıtalaý joıyldy jáne personal sany qysqartyldy.
