Memlekettik keńesshi Eýroparlament depýtattarymen kezdesti

ASTANA. QazAqparat - Memlekettik keńesshi Erlan Qarın Eýropa Parlamentiniń shetel isteri jónindegi komıtetiniń tóraǵasy Devıd Makallıster bastaǵan delegatsııamen kezdesti, dep habarlaıdy Aqorda.

Kezdesýde taraptar Qazaqstan men Eýropalyq Odaq arasyndaǵy keń kólemdegi áriptestik jáne yntymaqtastyqtyń qazirgi ahýaly men perspektıvasyna, sondaı-aq parlamentaralyq qatynastarǵa oń baǵasyn berdi.

Erlan Qarın eýropalyq depýtattarǵa Prezıdent Qasym-Jomart Toqaevtyń basshylyǵymen elimizde sońǵy jyldary júzege asqan reformalar týraly egjeı-tegjeıli aıtty.

Óz kezeginde Eýroparlament ókilderi Qazaqstanda iske asyp jatqan ınstıtýtsıonaldyq reformalardyń demokratııa qaǵıdattaryn nyǵaıtýǵa, zańnyń ústemdik qurýyn qamtamasyz etýge jáne adam quqyǵyn saqtaýǵa baǵyttalǵanyn atap ótti.

Sonymen qatar taraptar birqatar halyqaralyq jáne óńirlik máseleler tóńireginde pikir almasty.