«Memlekettik qarjyǵa túsirilgen fılmder zınaqorlyq, qyztekelik pen pedofılııany nege nasıhattaıdy?» - respýblıkalyq basylymdarǵa sholý
ASTANA. Jeltoqsannyń 4-i. /QazAqparat/ - Qazaq aqparat agenttigi respýblıkalyq basylymdarda jeltoqsannyń 4-i, juma kúni shyqqan ózekti materıaldarǵa sholýdy usynady.
***
«Eýropa estafetasy enshimizde!». Osy taqyryppen «Egemen Qazaqstan» gazetiniń juma kúngi nómirinde jaryq kórgen maqalada elmizdiń EQYU-ǵa tóraǵalyqty qabyldap alǵandyǵy jazylǵan. «Ejelgi Grekııanyń astanasy Afına shaharynda ótken Eýropadaǵy qaýipsizdik jáne yntymaqtastyq uıymyna qatysýshy elderdiń Syrtqy ister mınıstrleri keńesiniń 17-shi otyrysy osynaý bedeldi uıymǵa Grekııanyń tóraǵalyq mandaty aıaqtalǵanyn bildirip, Eýropa estafetasyn halyqaralyq saıası arenadaǵy jas ta jasampaz, baıypty da aıtýly oıynshy retindegi Qazaqstannyń enshilegenin jarııa etti. Jahandyq qarjy daǵdarysynan bylaı kóp máselesi shıelenisip, sonyń keıbiri ýshyǵyp turǵan qart qurlyqqa Qazaqstannyń tóraǵalyq etýi eń bir qıyn da qystalań shaqqa tuspa-tus kelip, jaýapkershilik júgin eselep arttyrǵany anyq. Sol turǵydan alǵanda EQYU-ǵa múshe 56 memlekettiń Qazaqstanǵa senimi Prezıdent Nursultan Nazarbaevqa senimi ekeni de belgili», dep jazady basylym.
Osy basylymnyń «Úkimet» atty aptalyq qosymshasynda «Básekelestigi basym 100 kompanııa» degen taqyryppen kólemdi maqala jaryq kórdi. Basylymnyń jazýynsha, qazaqstandyq 100 korporatsııanyń qosyndy tabysy 2008 jyly 2007 jylmen salystyrǵanda 35 paıyzǵa ósken. Bul jyldyq ınflıatsııa 9,5 paıyz bolyp otyrǵan jaǵdaıda qol jetkizgen jetistik. Al Reseıdiń «Ekspert-400» reıtıngilik saraptaýlarynyń derekterine qarasaq, reseılik 400 jetekshi kompanııanyń ótkizgen ónimderiniń kólemi 24 paıyzǵa ósken. Mine, osydan kórip otyrǵanymyzdaı, qazaqstandyq iri bıznes naqty ósý qarqyny jaǵynan ózderiniń reseılik áriptesterinen 1,5 ese asyp túsken.
Memleket basshysy Nursultan Nazarbaev jýyrda ótkizgen tikeleı jelide qazaqstandyqtardyń koıǵan saýaldaryna barlyq memlekettik organdardyń jetekshileri jaýap berýi kerek dep tapsyrǵan bolatyn. Osyǵan oraı búgin jaryq kórgen «Egemen Qazaqstan» gazeti arqyly QR Qurylys jáne turǵyn úı-kommýnaldyq sharýashylyq isteri agenttiginiń tóraǵasy Serik Nokın qazaqstandyqtardyń saýaldaryna jaýap bergen. Suhbat «Óz úıim - óleń tósegim» degen taqyryppen jarııalanǵan.
***
«Aıqyn» gazetiniń búgingi sanynda «Bas prokýror teketiresti joqqa shyǵardy» degen taqyryppen maqala jaryq kórdi. Jarııalanym keshe elordada ótken TMD-ǵa qatysýshy memleketterdiń bas prokýrorlary úılestirý keńesiniń 18-shi jıynyna arnalǵan. Basylymnyń jazýynsha, jıyn sońynda jýrnalısterge suhbat bergen Bas prokýror Qaırat Mámı Qazaqstannyń quqyq qorǵaý organdary arasynda júıeli taıtalas pen teketires barlyǵyn joqqa shyǵarǵan. Sondaı-aq ol Almaty qarjy polıtsııasy bastyǵynyń orynbasary A.Janteleevtiń tutqyndalýyna qatysty óz túsiniktemesin berip, onyń ústinen qozǵalǵan istiń ustaý jáne is qozǵaý kezinde óreskel qatelikter jiberilýine baılanysty toqtatýǵa týra kelgendigin habarlaǵan.
Osy basylymnyń juma kúngi sanynda Qazaq ınfokommýnıkatsııa akademııasynyń prezıdenti, ekonomıka ǵylymynyń doktory, Halyqaralyq baılanys akademııasynyń akademıgi Shahmaran Seıilovpen aradaǵy suhbat jarııalandy. Sandyq teleradıohabarlar taratý júıesine baılanysty órbigen ekeýara áńgime «Sandyq formatqa kóshý - jańa múmkindikterge jol ashady» degen taqyryppen berilgen.
«Memlekettik qarjyǵa túsirilgen fılmder zınaqorlyq, qyztekelik pen pedofılııany nege nasıhattaıdy?». Osy taqyryppen «Aıqyn» gazetinde jaryq kórgen maqala kúni keshe ǵana respýblıka kınoteatrlarynan kórsetile bastaǵan «Qaırat-chempıon. Beıkúná №1» atty otandyq kıno tóńireginde órbigen. «Eger de sarapshylar men kórermenderdi, kıno synshylaryn «Kelin» fılmindegi pedofılııa, zoofılııa men zınaqorlyq áreketteri shoshytsa, «Qaırat-chempıon» fılmi birjynysty mahabbatty, qyztekeler men lesbııandardy, zınaqorlar men arsyzdardy nasıhattaýymen ımandy jurttyń janyn túrshiktirip otyr», dep jazady basylym. Atalǵan jaıtqa oraı Májilis depýtatynyń, qoǵam qaıratkeriniń, atalǵan fılmniń bas prodıýsseriniń jáne «Bolashaq» respýblıkalyq qozǵalysy tóraǵasynyń orynbasarynyń pikirleri berilgen.
***
«Kólik jáne kommýnıkatsııa mınıstrligi men «Qazaqstan temir joly» ulttyq kompanııasynyń esepteri boıynsha 2020 jylǵa deıin temir joldy damytýǵa 4,2 trln. teńgeden astam qarjy kerek», dep jazady «Kazahstanskaıa pravda» gazeti. Basylymnyń jazýynsha, ulttyq kompanııa memlekettik qazynadan osy somanyń tek 4 paıyzyn ǵana surap otyr. Al 72 paıyzyn óz qarajatynan usynyp, 25 paıyzdy jeke sektordan qosýdy kózdeýde.
«Lıter» basylymy Qazaqstannyń ǵarysh salasynyń damýyna qatysty tikeleı jeli barysynda Elbasyna túsken saýaldarǵa jaýap jarııalaǵan. Máselen, qazaqstandyqtardy «KazSat-1» men «KazSat-2» spýtnıkteriniń jaı-kúıi, kezekti bizdiń ǵaryshkerdiń ǵaryshqa ushý perspektıvasy jáne «Báıterek» zymyran kesheni qurylysynyń jobasy qyzyqtyrady eken. Bul saýaldarǵa QR Ulttyq ǵarysh agenttiginiń tóraǵasy, ushqysh-ǵaryshker Talǵat Musabaev jaýap bergen.
QR Prezıdentimen «tikeleı jeli» barysynda energetıka jáne mıneraldyq resrýstar salasyna qatysty 426 suraq túsken. Osy suraqtarǵa QR Energetıka jáne mıneraldyq resýrastar mınıstri Saýat Myńbaetyń jaýaptary «Moskovskıı komsomolets v Kazahstane» gazetinde jarııalanǵan. Basylymnyń jazýynsha, barlyq saýaldar janar-jaǵarmaı, elektr energııasy baǵasyna, atom elektr sansysynyń qurylysyna, Qazaqstannyń soltústik aýdandaryn gazben jabdyqtaýǵa qatysty bolǵan.
Keshe RF Úkimetiniń tóraǵasy Vladımır Pýtın 4 saǵat boı tikeleı jeli arqyly reseılikterdiń 86 ótkir suraǵyna naqty jaýap bergen. Osyǵan oraı «Komsomolskaıa pravda Kazahstan» gazeti jeksenbilik nómirinde osy saýaldardyń birqataryn jaýaptarymen jarııalaǵan.
