Memlekettik qana emes, jeke kásiporyndar da qashyqtan jumys isteý rejimine kóshýi tıis - mınıstr

NUR-SULTAN. QazAqparat - Memlekettik emes jáne jeke kásiporyndar, uıymdar da qashyqtan jumys isteý rejimine kóshýi tıis. Bul týraly QR Eńbek jáne halyqty áleýmettik qorǵaý mınıstri Birjan Nurymbetov aıtty, dep habarlaıdy QazAqparat tilshisi.

«Birinshiden, barlyq mekeme, uıymdar múmkindigi bolsa, búkil jumysshylaryn qashyqtan jumys isteý tártibine aýystyrýy qajet. Keshe el Prezıdenti búkil memlekettik organdardyń, kvazımemlekettik uıym qyzmetkerleriniń 70 paıyzyn qashyqtan jumys isteýi rejimine aýystyrý týraly tapsyrma berdi. Basqa memlekettik emes jáne jeke kásiporyndar, uıymdar da osy tártipke kóshýi qajet. Bul jumys tártibi Eńbek kodeksiniń 138-babymen retteletin bolady», - dedi mınıstri.

Onyń atap ótýinshe, mekemeniń, uıymnyń basshysy buıryǵyn shyǵarady jáne jalaqy tóleý tártibi ózgermeıdi.

«Eger jumysshylardy qashyqtan jumys isteý rejimine aýystyrýǵa múmkindik bolmasa, jumys berýshi óz tarapynan qysqartylǵan jumys ýaqytyn belgileýge quqyly. Bul jaǵdaı Eńbek kodeksiniń 70-babymen retteledi. Jumys berýshi apta ishinde jumys kúnin nemese bir kúngi jumys saǵatyn azaıtýyna bolady. Bul rette jumys istep júrgen azamat jalaqyny sol jumys istegen saǵatyna baılanysty alatyn bolady», - dedi Birjan Nurymbetov.

Sonymen qatar mınıstrdiń sózine qaraǵanda, jumysyn múldem toqtatqan mekemeler jumysshylaryna eń tómengi jalaqydan tómen emes aılyq tóleýge mindetti.

Elimizdegi eń tómeni jalaqy kólemi - 42 500 teńge.