Memlekettik ınvestıtsııalardy paıdalanýdyń tıimdiligi talqylanýda
ASTANA. 14 naýryz. QazAqparat /Qanat Qulshymanov/ - Elordalyq «Dıplomat» otelinde «Memlekettik bıýdjettiń ınvestıtsııalary - tıimdilik, ashyqtyq jáne eseptilik» taqyrybyna arnalǵan «dóńgelek ústel» otyrysy ótýde.
Jıynǵa Parlament depýtattary, «Samuryq-Qazyna» Ulttyq ál-aýqat qorynyń, Ekonomıkalyq damý jáne saýda mınıstrligi Ekonomıkalyq zertteýler ınstıtýtynyń, «Indýstrııany damytýdyń qazaqstandyq ınstıtýty» aktsıonerlik qoǵamynyń Óndiristiń ornalasýyn zertteý jónindegi ortalyǵynyń, memlekettik organdar men úkimettik emes uıymdardyń ókilderi qatysýda.
«Memleket qarjy-ekonomıkalyq daǵdarystyń saldaryn eńserý jaǵdaıynda jalpy qaýipsizdikti qamtamasyz etý, áleýmettik turaqtylyqty saqtaý jáne ekonomıkany ári qaraı turaqty damytý maqsatynda daǵdaryqa qarsy aýqymdy baǵdarlama júzege asyryp otyr, postkeńestik keńistik aýmaǵynda buryn-sońdy qolǵa alynbaǵan mundaı is-shara kóptegen damyǵan elderdegi baǵdarlamalaryna jeteqabyl. Ol bank sektoryn, qurylys salasyn, kásipkerlikti, túrli maqsatty toptardy qoldaýǵa baǵyttalǵan. Ol ınvestıtsııalardyń barlyǵy damý ınstıtýttary arqyly bólinýde», - dedi «dóńgelek ústel» basynda sóz sóılegen Májilis depýtaty, Qazaqstannyń Azamattyq alıansynyń tóraıymy Aıgúl Soloveva.
«Qarjy mınıstrliginiń málimeti boıynsha, 2003-2009 jyldyń aralyǵynda qarjy aktıvterin alýǵa, onyń ishinde jarǵylyq kapıtaldy qalyptastyrýǵa jáne arttyrýǵa, respýblıkalyq bıýdjetten 2 trıllıonǵa jýyq teńge nemese 11,6 mıllıard AQSh dollary bólingen», - deıdi depýtat.
Memlekettik bıýdjetten bólinetin ınvestıtsııalardyń tıimdiligine, ashyqtyǵyna jáne eseptiligine toqtalǵan depýtat, azamattardyń jáne halyqtyń, azamattyq qoǵam ınstıtýttarynyń bılikke artqan senimderi elimizdiń ornyqty jáne turaqty damýynyń, áleýmettik kelisimniń negizin qurap otyrǵanyn aıtty.
Jınalǵan qaýym sondaı-aq zańdy tulǵalardyń jarǵylyq kapıtalyn tolyqtyrýǵa bólinip otyrǵan bıýdjet ınvestıtsııasynyń tıimdiligin, olardyń ashyqtyǵyn jáne eseptiligin qamtamasyz etý máselelerin, memlekettik aktıvterdi basqarý salasyndaǵy zańnamany jetildirýdiń jaıyn, t.b. máselelerdi talqylady.
