Memlekettik hatshy jastardy «Tyraýlap ushqan tyrnalar» qoıylymyn tamashalaýǵa shaqyrdy (FOTO)
Uly Otan soǵysyndaǵy Jeńistiń 70 jyldyq mereıtoıynyń qarsańynda rejısser Talǵat Temenov sahnalap otyrǵan «Tyraýlap ushqan tyrnalar» atty lırıkalyq drama jeńisten keıingi sovet soldattarynyń ómirinen syr shertedi.
«Bıyl bilesizder, úlken toı - Uly Jeńistiń 70 jyldyǵy. Bul mereıtoı jyl basynan bastap, ardagerlerge degen quttyqtaýlardan bastaldy. Elimizdiń túkpir-túkpirinde ár túrli is-sharalar ótkizilip jatyr. Sonyń ishinde Q.Qýanyshbaev atyndaǵy Memlekettik akademııalyq qazaq mýzykalyq drama teatrdyń sahnasyndaǵy «Tyraýlap ushqan tyrnalar» degen reseılik dramatýrg Valentın Ejovtyń shyǵarmasy boıynsha qoıylatyn spektakl. Qazaq tiline aýdarǵan Áshirbek Syǵaı. Bul qoıylymda eń birinshiden, bizdiń aǵalarymyz ben apalarymyzdyń úlken erligi kórsetiledi. Odan keıin adamı qasıetter, adamı qundylyqtar, mahabbat, Otanǵa degen súıispenshilik, erlik, ójettik - osynyń barlyǵy pash etiledi», - dedi Memlekettik hatshy tilshilerge bergen suhbatynda.
Onyń sózinshe, 70 jyl ótse de, ata-babalarymyzdyń jasaǵan erlikteri men keıingi urpaqqa syılaǵan jeńisi kimniń de bolsyn jadynda qala bermek.
«Jalpy Qazaqstan jerinen 1 mln. 800 myńnan astam soǵysqa shaqyrylǵan azamattar boldy, olardyń jartysy ókinishke oraı, Otan úshin jer jastandy. Qazir elimizde 4700-den astam ardagerler bar, olarǵa barlyq marapattar kórsetilip jatyr. Jyl boıyna da kórsetile beredi dep oılaımyn. Al búgingi myna qoıylym jastarǵa, bizdiń barlyǵymyzǵa úlgi bolatyn, patrıottyq sezimdi oıatatyn qoıylym bolady dep oılaımyn», - dep túıdi sózin G.Ábdihalyqova.
Spektakl orys dramatýrgy Valentın Ejovtyń «Bulbuldar túni» shyǵarmasy jelisi boıynsha sahanalandy. Qazaq tiline aýdarǵan belgili teatr synshysy, Memlekettik syılyqtyń ıegeri, professor - Áshirbek Syǵaı. Rejısserlyq nusqasyn Qazaqstannyń Halyq artısi, teatr jáne kıno rejısseri Talǵat Temenov jasady.
Atalmysh qoıylym bas keıipker Pernebek Boranbaev pen nemis qyzy Inganyń arasyndaǵy kezdeısoqtyqtan týyndaǵan mahabbat taqyrybyn kóteredi. Osy aralyqta adamzatqa ortaq qasıet - mahabbat pen jaýyzdyq, adamgershilik pen syılastyq, óshpendilik pen súıispenshilik, saǵynysh pen meıirimdiliktiń ushqynyn spektakl barysynan kóresizder.
Qoıylymdaǵy basty keıipker Pernebek Boranbaevty otandyq kıno ónerinde birneshe basty rólderdi somdap júrgen jas akter - Ábilmansur Serikov sahnalasa, nemis qyzy Inganyń rólinde -teatrdyń jas aktrısasy Aqmaral Tanabaeva. Sondaı-aq, spektakl barysynan búginde kórermenniń ystyq yqylasyna bólenip júrgen teatr artısteri, Qazaqstannyń Halyq artısi T. Meıramov, Qazaqstannyń eńbek sińirgen qaıratkerleri - A. Omarov, N. Óteýilov, QR «Daryn» jastar syılyǵynyń ıegeri S. Qashqabaev pen Q. Qystyqbaevtar óner kórsetedi.
