Memlekettik hatshy jastar arasyndaǵy qylmystyń aldyn alý sharalaryn qabyldaýdy tapsyrdy
«Jastar arasyndaǵy qylmystyń órshýine qarsy profılaktıkalyq sharalar keshenin qabyldaýdy tapsyramyn. Devıantty minez-qulyqqa beıim quqyqbuzýshylardy qoǵamdyq qyzmetke tartý boıynsha jumystardy uıymdastyrý qajet. Ásirese, maskúnemdik pen nashaqorlyqqa salynǵan otbasylardyń balalaryna erekshe nazar aýdarý kerek», - dedi G.Ábiqalyqova.
Memlekettik hatshy kúrdeli ómirlik jaǵdaılarǵa tap bolǵan, sonyń ishinde bas bostandyǵynan aıyrý oryndarynan bosap shyqqan jastar úshin áleýmettik jobalardy júzege asyrý múmkindigin qarastyrýdy tapsyrdy.
«Psıhologııalyq kúızelis jaǵdaıyndaǵy jáne táýekel toptaryndaǵy jastardy erterek anyqtaý boıynsha sharalar keshenin qabyldaý qajet. «Rýhanı jańǵyrý» baǵdarlamasy men «Aýyl - el besigi» arnaıy jobasyn júzege asyrýǵa jastardy tartý boıynsha aqparattyq jumystar júrgizilsin», - dep atap ótti G.Ábdiqalyqova.
Bul tapsyrmalar Іshki ister, densaýlyq saqtaý, bilim jáne ǵylym, qoǵamdyq damý, aqparat jáne kommýnıkatsııalar mınıstrlikterine jáne basqa da múddeli memlekettik organdarǵa, Astana, Almaty, Shymkent qalalary men oblystarynyń ákimdikterine júkteldi.
Eske salaıyq, búgin Astanada Memlekettik hatshy Gúlshara Ábdiqalyqovanyń jetekshiligimen QR Prezıdenti janyndaǵy Jastar saıasaty jónindegi keńestiń kezekti otyrysy ótti.
