Memlekettik hatshy «Jalpyǵa Ortaq Eńbek Qoǵamyna qaraı» forýmyna qatysty

ASTANA. QazAqparat - Qazaqstan Respýblıkasynyń Memlekettik hatshysy Gúlshara Ábdiqalyqova «Jalpyǵa Ortaq Eńbek Qoǵamyna qaraı» atty respýblıkalyq forýmǵa qatysty. Bul týraly Aqordanyń baspasóz qyzmeti habarlady.

Forýmǵa Parlament depýtattary, Prezıdent Ákimshiligi, Úkimet, ortalyq jáne jergilikti atqarýshy organdar, halyqaralyq uıymdar, bıznes-qoǵamdastyq, kásipodaqtar men jurtshylyq ókilderi qatysty.

Forýmdy ashqan Gúlshara Ábdiqalyqova Memlekettik basshysy «Bolashaqqa baǵdar: rýhanı jańǵyrý» atty baǵdarlamalyq maqalasynda «Qazirgi tańda tek jeke adam emes, tutas halyq básekelik qabiletin arttyrsa ǵana tabysqa jetýge múmkindik alady» dep atap ótkenin aıtty.

Memlekettik hatshy keleshekte ulttyń tabysqa jetýi adamı kapıtaldyń sapasymen ólshenetinin atap ótti.

Gúlshara Ábdiqalyqova Jalpyǵa Ortaq Eńbek Qoǵamy ıdeıasynyń maqsattaryna jetkizetin birqatar memlekettik jáne salalyq baǵdarlamanyń oryndalý nátıjelerine toqtaldy.

- Memleket, jekemenshik sektor jáne kásibı birlestikter yntymaqtastyǵynyń tetikterine negizdelgen áleýmettik-eńbek qatynastarynyń jańa modeli qoldanysqa engizildi. Memlekettik jáne úkimettik baǵdarlamalar aıasynda bıyl 290 myń jumys orny ashyldy. 500-ge jýyq kásibı standarttar ázirlendi, - dedi Gúlshara Ábdiqalyqova.

Memlekettik hatshy iri jáne orta kásiporyndardyń shamamen 90 paıyzynda, sondaı-aq shaǵyn kásiporyndardyń 30 paıyzdan astamynda áleýmettik-eńbek qatynastaryn retteıtin ujymdyq sharttar bar ekenin atap ótti.

- Elimizde jańa joba - tegin kásibı bilim berý isi qolǵa alyndy. Jastar úshin óziniń eńbektegi alǵashqy mamandyǵyn memleket esebinen ıgerý múmkindigi paıda boldy, - dedi Gúlshara Ábdiqalyqova.

Forým aıasynda «Eńbek joly» atty respýblıkalyq konkýrstyń jeńimpazdaryn marapattaý rásimi ótti. Oǵan 329 adam qatysty. Nátıjesinde «Úzdik eńbekkerler áýleti» nomınatsııasy boıynsha Aqtóbe oblysynan temirjolshy Jubanyshevtar otbasy; «Jumys isteıtin jastardyń úzdik tálimgeri» nomınatsııasy boıynsha Batys Qazaqstan oblysynan energııa kásiporny óndiristik-tehnıkalyq qyzmet bóliminiń bastyǵy Tilek Harın; «Úzdik jas qyzmetker» nomınatsııasy boıynsha Ońtústik Qazaqstan oblysynan muǵalim Nursultan Abbasov; «Jas urpaqty eńbekke baýlýdaǵy úlesi úshin» nomınatsııasy boıynsha Ońtústik Qazaqstan oblysynan balabaqsha meńgerýshisi Nurjamal Tóleýova jeńimpaz atandy.

Sonymen qatar, Qazaqstannyń qalyptasýy men damýyna úles qosqan el ekonomıkasynyń túrli salasynyń ardagerleri «Eńbek ardageri» medalimen marapattaldy.

Forým sońynda qazaqstandyq tanymal estrada ártisteriniń qatysýymen kontsert ótti.