Memlekettik hatshy- Syrtqy ister mınıstri Qanat Saýdabaev Almatyda zııaly qaýymmen kezdesti
; ALMATY. Qyrkúıektiń 13-i. QazAqparat /Erbol Azanbek/ - Búgin Almatyda QR Memlekettik hatshysy-Syrtqy ister mınıstri Qanat Saýdabaev bir top qalamgerlermen jáne BAQ basshylarymen kezdesti,
dep habarlaıdy QazAqparat.
Kezdesý barysynda Memlekettik hatshy elimizdiń EQYU-ǵa tóraǵalyǵy men 2 aıdan keıin ótetin uıym sammıti týraly baıandady. «Sońǵy 8 aıda Qazaqstan álemdegi bedeldi uıymnyń biri EQYU-ǵa tóraǵa bolyp otyr. Sondaı-aq jaqynda sońǵy 11 jylda bolmaǵan uıymǵa múshe elderdiń basshylarynyń kezdesýi ótpekshi. Bul Qazaqstannyń táýelsizdik jyldaryndaǵy tabysyn álem elderiniń joǵary baǵalaǵany. Bul shyn máninde bizdiń Elbasynyń dúnıe júzi aldyndaǵy bedeliniń bıiktigi. Aldaǵy sammıtke EQYU-ǵa múshe 67 memlekettiń basshylary, onyń ishinde uıymǵa áriptes 12 memleket basshylary, sondaı-aq 65 halyqaralyq uıymnyń basshylary keledi. Bul tarıhı dúnıe, sátin salsa, endi tek 55 jylda ǵana qaıtalanady. Bul oqıǵa táýelsizdigimizdiń 20 jyldyǵy qarsańynda oryn alyp otyr. Men óz basym 19 jylda elimiz osyndaı dárejege jetkenine maqtanamyn. Aldaǵy ýaqytta osy qol jetken jetistikti ary qaraı jalǵaý paryz. Osy sharaǵa bárimizdiń úles qosýymyz kerek. Elimizdiń rýhanı, mádenı salasyndaǵy tulǵalar retinde osy istiń basynda bolyp, halyqqa jetkizetin sizder, sondyqtan búgingi kezdesýde osy másele boıynsha ózderińizben oı bólisý basty maqsat», dedi Q.Saýdabaev.
Sharaǵa kórnekti ádebıettanýshy ǵalym, akademık Serik Qırabaev, QR Memlekettik syılyǵynyń ıegeri, ádebıet synshysy Sherııazdan Eleýkenov, jazýshylar Dýlat Isabekov, Orazbek Sársenbaev, Maral Sqaqbaev, Beksultan Nurjekeev, mádenıettanýshy Murat Áýezov, sondaı-aq jetekshi BAQ-ynyń bas redaktorlary Qalı Sársenbaı, Shámsheddın Patteev, Nurtóre Júsip, Jumabaı Shashtaıuly, Baqyt Sarbalaev, Janarbek Áshimjan, «Qazaqstan» ulttyq teleranasynyń prezıdenti Janaı Omarov qatysyp, óz oılaryn ortaǵa saldy.
