Memlekettik hatshy: sporttaǵy reforma - Prezıdent aldymyzǵa qoıǵan mindet
«Búginde eldiń bárinde endi ne isteý kerek degen suraq týyndap jatyr. Eń aldymen balalar men jasóspirimderdiń dene shynyqtyrý jáne sportpen aınalysýyn qamtamasyz etýimiz qajet. Óskeleń urpaqtyń sportpen shuǵyldanyýyna jaǵdaı jasamaı, iri jarystarda jeńiske jetemiz deý ábestik. Sondyqtan elimizdiń barlyq aımaqtaryndaǵy sport mektepteri men úıirmeleriniń jaǵdaıyna tereń taldaý jasalyp, olardy qoldaýdyń keshendi jospary jasalýy tıis. Ondaǵy jumysty júıelep, qur esep pen bos kórsetkishke emes naqty nátıjege eńbektengen jón. Halyqtyń salaýatty ómir saltyn ustanyp, buqaralyq sportpen aınalysýyn damytqan durys»,- dedi Q. Kósherbaev.
Sondaı-aq, Memlekettik hatshy sportpen shuǵyldanatyn halyqtyń sany artsa, tıisinshe sapanyń da jaqsaratynyn aıtty.
«Al sapa bizdiń Azııa, álem birinshilikteri men Olımpıadada máreniń aldynan kelip, kók baıraǵymyzdyń jelbireýine yqpal etedi. Bul kezek kúttirmeı jedel qolǵa alatyn sharýa. Osy rette Prezıdent buqaralyq jáne balalar sportyn damytýǵa kóńil bólip, sol arqyly álemdik arenada úlken tabystarǵa qol jetkizýge umtylý qajet dep tapsyrdy. Sporttaǵy reforma Memleket basshysy aldymyzǵa qoıǵan osyndaı mindetten bastalýy qajet. Tokıo tórindegi qatelikterimizdi túzep, súringen tusymyzdan sabaq alyp, aldaǵy halyqaralyq iri jarystarda, Parıj Olımpıadasynda Qazaqstannyń sporttyq derjava ekenin tanytý - aldymyzdaǵy basty mindet», - deıdi ol.
Buǵan deıin Q. Kósherbaev elimizde sport salasyna shuǵyl reformanyń qajettigin málim etken edi.
Aıta ketsek, búgin elordada QR Memlekettik hatshysy Qyrymbek Kósherbaev Tokıo-2020 Olımpıadasynyń jeńimpazdaryn jeńisimen quttyqtap, QR Prezıdenti Qasym-Jomart Toqaevtyń atynan birqatar memlekettik nagradalardy tabys etti.