Memlekettik hatshy shyǵarmashyl jastarmen kezdesti
Kezdesýge QR Mádenıet jáne sport mınıstri Arystanbek Muhamedıuly, jas daryndar - jazýshy B.Sarybaı, aqyn Q. Omarova, sýretshi K. Bekmurzaeva, músinshi L. Kochetov, teatr jáne kıno akterleri - Á. Ahmetov, J. Maqajanova, pıanıst R. Abdysaǵın, balet solısi B. Adamjan, ánshi I. Kaısıdı jáne dırıjer Q. Omarov qatysty.
«Elbasymyz Nursultan Nazarbaev «Qazaqstan-2050» strategııasynda jastarǵa erekshe kóńil bóldi. Odan keıin, «Intellektýaldy ult-2020» degen baǵdarlamasy qabyldandy. Qazir elimizde jastar saıasaty jónindegi úlken tujyrymdama bar. Osynyń bári árıne, jastarǵa jol ashady, baǵdar beredi dep oılaımyn. Endi, jaqynda ǵana Elbasy úlken reformalar jóninde halyqqa óz Joldaýyn aıtty. Ol - ekonomıkalyq jańa beleske kóterý, saıası reformalar, sonymen birge, Sizder oqyǵan bolarsyzdar, «Bolashaqqa baǵdar: rýhanı jańǵyrý» atty úlken baǵdarlama shyqty. Osy baǵdarlama boıynsha naqty tapsyrmalar belgilendi. Onyń ishinde qazaq tilin latyn álipbıine kóshirý týraly, «Týǵan jer» atty zamanaýı mádenıetti jańǵyrtý máselesine baılanysty jobalar bar. Osy turǵyda, jastarǵa básekelestikke tótep berý, myqty bolý, pragmatızmge negizdelgen ómir ustanymyn negizge alý, bilim saltanat qurǵan qoǵam qalyptastyrý degen sııaqty úlken talaptar qoıylyp otyr. Sondyqtan Elbasy osynyń barlyǵyn Sizdermen baılanystyryp otyr», - dep atap ótti Memlekettik hatshy Qazaqstannyń jas shyǵarmashyl jastaryna qaratyp aıtqan sózinde.
Memlekettik hatshy shyǵarmashyl jastardyń el Prezıdenti aıqyndaǵan mindetterdi iske asyrýǵa belsene atsalysatyndyqtaryna senim bildirdi.
«Qazaqstan halqy jaqyn ýaqytta 18 mıllıonnan asady. Bizdiń elimizdiń árbir tórtinshi azamaty - jas adam. Qazir Mádenıet jáne sport mınıstrligi túrli baǵdarlamalardy qolǵa alyp jatyr. Qazir bizdiń jastarymyzda Dımash Qudaıbergen sııaqty týǵan mádenıetti tanytatyn barlyq jaǵdaılary bar. Áleýetimiz, asar belesimiz kóp, biraq ol úshin bizge tynbaı eńbek etý kerek, ónerimizdi alǵa jyljytýymyz shart. Sol úshin Sizdermen keńeskeli bas qosyp otyrmyz», - dedi G. Ábdiqalyqova.
Óz kezeginde, kezdesýge kelgen jastar Prezıdenttiń «Bolashaqqa baǵdar: rýhanı jańǵyrý» atty baǵdarlamasy barlyq jalyndy jastar úshin baǵdar bolatynyn atap ótti.
«Metaforamen sóz bastaǵym kelip otyr. Eger árbirimiz bir-bir aǵashtan otyrǵyzatyn bolsaq, 20 jyldan keıin bizdiń elimiz gúldengen baqqa aınalady. Jastardy naqty paıda ákelýge, árbir iste úles qosýǵa shaqyramyn. Armandaý azdyq bolady. Qadam qadammen kókeıkesti problemalardy sheship otyrýmyz qajet. Bizde ony ispen dáleldeıtin áleýet te, bilim de jetedi», - deıdi sýretshi, dızaıner Krıstına Bekmurzaeva.
Onyń pikirinshe, Qazaqstannyń barlyq mádenı qundylyqtaryn onlaın rejımde qoljetimdi etetin biryńǵaı resýrs qurý qajet.
«Negizgi aqparattyq aǵyn Internette shoǵyrlanyp jatyr. Meniń oıymsha, bizdiń elde ulttyq mádenı jetistikterimizdi bir arnaǵa toǵystyratyn jalpyulttyq resýrs qurylýy tıis. Meniń ıdeıamnyń túp maqsaty - adam álemniń kez kelgen buryshynda otyryp-aq, qazaqtyń ulttyq mýzyka kontsertterin onlaın tamashalaı alatyn bolsa, eldegi kez kelgen mýzeıdi onlaın aralap, elektrondy formatta kez kelgen ádebıetti oqýǵa múmkindik alsa degen oıdan shyqty», - dep túıdi sózin K. Bekmurzaeva.
