Memlekettik hatshy M. Qul-Muhammedtiń tóraǵalyǵymen Sybaılas jemqorlyqqa qarsy kúres komıssııasynyń otyrysy ótti

ASTANA. 11 mamyr. QazAqparat - Búgin Aqordada QR Memlekettik hatshysy Muhtar Qul-Muhammedtiń tóraǵalyǵymen QR Prezıdenti janyndaǵy Sybaılas jemqorlyqqa qarsy kúres máseleleri jónindegi komıssııanyń kezekti otyrysy bolyp ótti.

Komıssııa otyrysynda qurylys, turǵyn úı-kommýnaldyq sharýashylyq jáne jer qatynastary salalaryndaǵy kókeıkesti máseleler talqylandy.

«Elimizde qurylys, turǵyn úı-kommýnaldyq sharýashylyq jáne jer qatynastary salalaryn odan ári damytýǵa basa nazar aýdarylǵan. Bul maqsattarǵa bıýdjetten eleýli qarjy bólinedi. Tek 2011 jyldyń ózinde ǵana qurylys jumystarynyń kólemi 2 trln. 82 mlrd. teńgeni qurady. Elbasy N. Nazarbaev aǵymdaǵy jylǵy Joldaýynda Úkimetke 1 shildege deıin «Qoljetimdi baspana-2020» jańa baǵdarlamasyn daıyndap, qabyldaýdy tapsyrdy. Sondyqtan qoıylǵan mindetterdi utymdy iske asyrý atalǵan salalarda sybaılas jemqorlyqqa qarsy is-qımyl boıynsha qabyldanatyn sharalardyń tıimdiligine tikeleı baılanysty», - dedi jıyndy ashqan Memlekettik hatshy M. Qul-Muhammed.

Onyń aıtýynsha, Elbasynyń nusqaýyna sáıkes, sybaılas jemqorlyqqa qarsy kúresti júıeli túrde kúsheıtý, azamattardyń quqyqtaryn saqtaý, zań men tártiptiń ústemdigin naqty jáne dáıekti qamtamasyz etý qajet.

Jıyn barysynda Qurylys jáne turǵyn úı-kommýnaldyq sharýashylyq isteri agenttiginiń tóraǵasy S.Nokınniń, Jer resýrstaryn basqarý agenttigi tóraǵasy Q.Otarovtyń, Ekonomıkalyq qylmysqa jáne sybaılas jemqorlyqqa qarsy kúres agenttiginiń tóraǵasy R. Túsipbekovtyń, Bas prokýror A. Daýylbaevtiń jáne Esep komıtetiniń tóraǵasy O.Óksikbaevtiń esepteri tyńdaldy. Otyrystyń qorytyndysy boıynsha memlekettik organdarǵa kadrlyq jumysty jaqsartý, sondaı-aq bıýdjet qarajatynyń esebinen qarjylandyrylatyn ınvestıtsııalyq jobalar baǵdarlamalarynyń iske asyrylýyna baqylaýdy kúsheıtý boıynsha naqty usynystar berildi.