Memlekettik hatshy M. Qul-Muhammed Prezıdenttik mádenıet ortalyǵynyń ujymyna jańa Ortalyq pen onyń basshysyn tanystyrdy
ASTANA. 24 qańtar. QazAqparat /Qanat Mámetqazyuly/ - Búgin Qazaqstan Respýblıkasynyń Memlekettik hatshysy Muhtar Qul-Muhammed elordadaǵy Prezıdenttik mádenıet ortalyǵynda bolyp,
onyń ujymyna jańadan qurylǵan «Nazarbaev ortalyǵy» kópfýnktsıonaldy ǵylymı-taldaý jáne gýmanıtarlyq aǵartý memlekettik mekemesiniń dırektory bolyp taǵaıyndalǵan Qanat Saýdabaevty tanystyrdy.
Eń aldymen Memlekettik hatshy Elbasy Jarlyǵyna sáıkes «Nazarbaev ortalyǵy» atty jańa ortalyq qurylatynyn málimdep, osy qurylymnyń mánine de toqtalyp ótti. «Bundaı ortalyq dúnıejúzi órkenıetti elderiniń kóbisinde bar úrdis. AQSh-tyń áıgili prezıdentteriniń qaı-qaısysynyń bolmasyn ózine arnalǵan ortalyqtary bar. Birinshi prezıdent Vashıngton, odan keıingi Adams, odan keıingi T. Djeffersonnan bastap Klıntonǵa deıin óziniń jumys istep turǵan ortalyqtary barshylyq. Kishi Býshtyń ózi de «elge istegen isteriniń barlyǵy ortalyqta jınaqtalyp tursyn» degen nıetpen ortalyǵyn ashqaly jatyr. Sondyqtan Qazaqstanda da óz eliniń Tuńǵysh Prezıdenti, memleket Táýelsizdiginiń negizin qalaýshy Elbasy Nursultan Ábishulynyń ómirin, shyǵarmashylyǵyn, san-salaly saıası qyzmetin zertteıtin, taldaıtyn, ony bolashaq urpaqqa jetkizetin ortalyqty jeke-dara salatyn ýaqyt jetti», - dep atap ótti Memlekettik hatshy.
Onyń aıtýynsha, osy ýaqytqa deıin Prezıdenttik mádenıet ortalyǵynyń dırektoryn taǵaıyndaý-bosatý Mádenıet mınıstriniń buıryǵymen júrgizilse, qazirgi ýaqytta onyń ornyna jańadan qurylyp jatqan ortalyqtyń mártebesi de ósip, onyń basshysy tek Elbasynyń Jarlyǵymen ǵana taǵaıyndalatyn bolady.
Jańa «Nazarbaev ortalyǵynyń» jarǵysyn bekitý aldaǵy bir aı ishinde júrgiziletin bolady.
