Memlekettik hatshy: Qazaqstan sportynyń áleýeti mol
ASTANA. 20 maýsym. QazAqparat - Qazaqstan sportyndaǵy jetistikter elimizdiń bul saladaǵy áleýetiniń mol ekendigin kórsetip otyr.
Bul týraly búgin Aqordada sporttyq joǵary jetistikter men dene shynyqtyrýdyń odan ári damýyna arnalǵan respýblıkalyq keńes barysynda QR Memlekettik hatshysy Muhtar Qul-Muhammed málim etti.
«Qazirgi kezde álem jurtshylyǵynyń nazary Londonǵa aýyp otyr. Barlyq memleketter ózderiniń sportshylaryn daıarlap, osy álemdik sport básekesine úlken daıyndyqpen kelýde. Búginde álem jurtshylyǵy Qazaqstandy ekonomıkasy, mádenıeti, áleýmettik jaǵdaıy qarqyndy damý jolyna túsken úlken memleket retinde ǵana emes, sonymen qatar sporty damyǵan memleket retinde de jaqsy biledi. Ótken jylǵy Qysqy Azıada oıyndarynyń Qazaqstanda ótkizilip, onda bizdiń elimizdiń Qytaı, Japonııa, Ońtústik Koreıa sekildi sporty óte jaqsy damyǵan memleketterdiń aldyna túsip, komandalyq esepte birinshi oryndy jeńip alýy Qazaqstan sportynyń áleýetiniń mol ekenin kórsetip otyr», - dedi Memlekettik hatshy.
Osy oraıda ol buǵan deıingi kezderde de Qazaqstan sporty óziniń myqtylyǵyn álemdik úlken dodalarda, olımpıadalarda, chempıonattarda dáleldegenin qadap aıtty.
Sonymen qatar, M. Qul-Muhammed elimizdiń aýmaǵynda álemdik deńgeıdegi sporttyq nysandar tapsyrylyp jatqandyǵyn, bilikti jattyqtyrýshylar shaqyrylyp, sport salasyna qarjylandyrý jyl saıyn artyp otyrǵandyǵyn jetkizdi.
«Endeshe biz London Olımpıadasynda Elbasynyń otandyq sportqa degen qamqorlyǵyna saı laıyqty nátıjege qol jetkizýimiz kerek dep esepteımiz», - dedi Memleket hatshy.
Aıta keteıik, keńes barysynda QR Sport jáne dene shynyqtyrý isteri agenttiginiń tóraǵasy Talǵat Ermegııaev aldaǵy Olıpıadaǵa daıyndyq barysy jaıynda baıandama jasady.
