Memlekettik hatshy densaýlyq saqtaý salasynyń mamandaryn qabyldady

ASTANA. QazAqparat - Búgin Aqordada QR Memlekettik hatshysy Gúlshara Ábdiqalyqova Medıtsına qyzmetkerleri kúni qarsańynda saladaǵy joǵary oqý oryndary men ǵylymı mekemelerdiń, alǵashqy medıtsınalyq-sanıtarlyq kómek kórsetý, sanıtarlyq avıatsııa dárigerlerimen jáne farmatsevtıka mamandarymen aýyldyq dárigerlermen kezdesti.

«Ult jospary bizdi medıtsınalyq qyzmet kórsetýdiń aldyńǵy qatarly standarttaryn engizýge baǵdarlaıdy. Ol úshin Densaýlyq saqtaý jáne áleýmettik damý mınıstrligi tarapynan medıtsınalyq qyzmet sapasy boıynsha birikken komıssııa qurylýda. Ult densaýlyǵy memlekettik saıasattyń mańyzdy basymdyqtarynyń biri bolyp tabylady. Osy oraıda memleket árdaıym otandyq medıtsınany jetildirý máselelerine aıryqsha nazar aýdarýda», - dedi G. Ábdiqalyqova.

Sońǵy 5 jylda qazaqstandyqtardyń kútilgen ómir súrý jasynyń uzarýy otandyq medıtsınanyń qol jetkizgen tabystarynyń aıǵaqty dáleline aınaldy. Taratylǵan málimetterge qaraǵanda, ómir súrý jasy 3 jylǵa uzaryp, 2014 jyly 71,6 jasty qurady. 2010 jylmen salystyrǵanda ana ólimi 2 esege, bala ólim-jitimi 1,7 esege tómendedi.

Jıyn barysynda densaýlyq saqtaýǵa, onyń ishinde alǵashqy medıtsınalyq kómek kórsetýge, óńirlik ǵylymı mamandandyrylǵan medıtsınalyq uıymdardyń, aýyldyq medıtsınalyq mekemelerdiń jumysyna baılanysty máseleler talqylandy.

Saladaǵy ózekti máselelerdi qarastyrý qorytyndysy boıynsha Memlekettik hatshy quzyrly memlekettik organdarǵa birqatar naqty tapsyrmalar berdi.