Memlekettik hatshy: Búgingi kúnniń bıiginen ótken dáýirdi durys baǵalaý bizdiń óz ata-babalarymyzdyń aldyndaǵy perzenttik paryzymyz
Búgin Elordadaǵy Eýrazııa ulttyq ýnıversıtetinde Qazaqstan Respýblıkasynyń ulttyq tarıhyn zerdeleý jónindegi vedomstvoaralyq jumys tobynyń keńeıtilgen otyrysynda QR Memlekettik hatshysy Marat Tájın osylaı málim etti.
Memlekettik hatshynyń aıtýynsha, Qazaqstannyń HH ǵasyrdaǵy tarıhy kóp jaǵdaılarda ulttyq jáne totalıtarlyq qaqtyǵysynyń tarıhy. «Bul ulttyq sana-sezimdi aıaýsyz saıası mashınanyń ezip-janshý tarıhy, ol úshin aldynda kim turǵany - qazaq pa, orys pa, ýkraındyq pa, ózbek pe - báribir. Biz tarıhtyń naqty tetikterin dálme-dál ári aıdan anyq túsinýge tıispiz», - degen M. Tájın basqa bir qaǵıdatty suraqqa nazar aýdardy. «Bul - tutas urpaqtardyń tarıhy, bizdiń atalarymyz ben babalarymyzdyń tarıhy qandaı da bir syndarly maǵynadan jurdaı bolǵany ma? Árıne, olaı emes, ótken urpaqtardyń ómiri maǵynadan jurdaı emes. Bul arada máseleniń tarıhı jáne etıkalyq qyrlary bar. Kez kelgen tarıhı dáýirde adamdardyń ómiri men saıası júıe úılese bermeıdi. Qazaqstandyqtardyń HH ǵasyrdaǵy urpaǵynyń ómiri ózinshe joǵary derbes maǵynaǵa ıe. Olardyń ózderiniń qýanyshy, ózderiniń jeńisteri men jetistikteri boldy. Tutas urpaqtar ómir súrgen tarıhtyń osynaý úlken qatparyn syzyp tastaý, ony bir ǵana qara boıaýmen boıaı salý taza tarıhı turǵydan qaraǵanda da ádiletsizdik bolar edi. Túptep kelgende, búgingi kúnniń bıiginen ótken dáýirdi durys baǵalaý - bizdiń óz ata-babalarymyzdyń aldyndaǵy perzenttik paryzymyz. Mundaıda bir qıyrdan bir qıyrǵa shyǵyp ketýdiń qaýpi birdeı», - dedi M. Tájın.
Onyń aıtýynsha, «ótken dáýirdi dáripteýdiń qajeti joq». «Baıaǵy bir tártipti ańsaı bermeı, HH ǵasyrdaǵy qıynshylyqqa toly tarıh týraly ashyq aıtý kerek. Sol tártiptiń tusynda mıllıondaǵan ata-babalarymyzdyń qalaı ómir súrgenin biz jaqsy bilemiz. Sondyqtan, totalıtarlyq memlekette «ult máselesin sheshýdiń» barsha ǵajaptaryn ashyp kórsetý - bizdiń tarıhshylarymyzdyń tikeleı paryzy. Ekinshiden, ótken kúnge obektıvti qaraýymyz qajet. Aǵa býynnyń nanym-senimderine qurmetpen qarap qana qoımaı, tarıhta tek qara men aq tústiń ǵana bolmaıtynyn uǵynýymyz kerek», - dedi M. Tájın.
