Memlekettik hatshy birqatar azamatqa memlekettik nagradalardy tapsyrdy
«Otanymyzdyń osynaý qasıetti merekesi qarsańynda jyl saıyn Qazaqstannyń jarqyn bolashaǵy jolynda qajyrly eńbegimen qaltqysyz eńbek etip jatqan asyl azamattarymyzdy mártebeli memlekettik nagradalarmen marapattaý ıgilikti dástúrge aınaldy. Árıne, Táýelsizdiktiń máni de, mańyzy men maǵynasy da aıryqsha. Qazaq degen halyqtyń san ǵasyrǵa jalǵasqan jáne qazir ǵana iske asqan armany. Derbes memleket qurý halqymyzdyń baıyrqaly bostandyqqa, egemen eldikke, azat rýhqa degen arpalysynyń naqty jemisi»,- dedi Memlekettik hatshy.
Onyń atap ótýinshe, Táýelizdikti ornyqtyrýda Qazaqstannyń Tuńǵysh Prezıdenti - Elbasy Nursultan Nazarbaevtyń orasan zor kúsh-jigeri, tereń aqyl-parasaty, syndarly, salmaqty saıasaty jáne barlyq qazaqstandyqtardyń birligi men jasampaz eńbegi aıryqsha ról atqarǵan. Memlekettik hatshynyń aıtýynsha, búgingi tańda Táýelsizdikti nyǵaıtýdaǵy tarıhı joldy jalǵastyryp kele jatqan Memleket basshysy Qasym-Jomart Toqaev ta Qazaqstannyń taıaý jyldardaǵy qarqyndy damý baǵyttaryn belgilep, atalǵan mindetteri sheshýdiń naqty joldaryn kórsetip bergen.
«Bizdiń maqsat - osy keleli mindetterdi bárimiz jumylǵan judyryqtaı birge júzege asyryp, Táýelsizdigimiz jańa beleske kóterý, Táýelsizdigimizdi baıandy etý. Bul oraıda sizder ár saladaǵy eńbekterińizben memlekettiliktiń irgesin bekemdeýge, elimizdiń áleýmettik-ekonomıkalyq qoǵamdyq-saıası jáne mádenı-rýhanı damýyna, salıqaly ult, salaýatty urpaq qalyptastyrý isine eleýli úles qosyp júrsizder. Sondyqtan Memleket basshysymen jarlyǵymen sizder Táýelsiz elimizdiń joǵary memlekettik nagradalarymen marapattaldyńyzdar», - dedi Qyrymbek Kósherbaev.
Osydan keıin Memlekettik hatshy aqyn Marfýǵa Aıthojaǵa ІІ dárejeli «Barys» ordenin, aqyn Nesipbek Aıtqa ІІІ dárejeli «Barys» ordenin tapsyrdy. Sondaı-aq bir tóp óner qaıratkeri «Qazaqstannyń eńbek sińirgen qaıratkeri» qurmetti ataǵyn aldy. Bir top ǵalymǵa Qazaqstan Respýblıkasynyń ál-Farabı atyndaǵy ǵylym men tehnıka salasyndaǵy 2019 jylǵy memlekettik syılyǵy berildi.
