Memlekettik hatshy biregeı ortalyqta turatyn jetim balalardyń jaǵdaıymen tanysty
Aqtóbede ótip jatqan «Týǵan jer» respýblıkalyq forýmyna kelgen QR Memlekettik hatshysy Gúlshara Ábdiqalyqova Sazdy aýyldyq okrýgindegi Shákárim Qudaıberdiuly atyndaǵy №66 mektep-gımnazııasynyń ashylýyna qatysty. Mektep aýmaǵy - 5 myń sharshy metr. 600 oqýshyǵa eseptelgen mektepte ınteraktıvti taqtalar, mýltımedıalyq kabınetter men sport alańy bar.
Aqtóbe oblysy ákiminiń baspasóz qyzmetinen habarlaǵandaı, G.Ábdiqalyqova sondaı-aq «Meıirim» áleýmettik beıimdeý ortalyǵyna baryp, balalar úıiniń túlekteri men ata-ana qamqorlyǵynsyz qalǵan balalardyń jaǵdaıymen tanysty. Búginde Qazaqstanda balamasy joq keshende 16-29 jas aralyǵyndaǵy 90-ǵa jýyq jas turady. Dızaıny, arhıtektýrasy, jabdyqtalýy jáne abattandyrylýy jóninen bul ortalyqtyń Qazaqstanda teńdesi joq. Jalpy aýmaǵy - 4 389,8 sharshy metr. Joba quny - 4 mıllıard teńge. Munda 5 korpýs ornalasqan. Onyń tórteýinde eki qabatty jataqhanalar bolsa, al besinshisi - ákimshilik korpýs. Jalpy alǵanda, ortalyqta bir bólmeli 80 páter bar. Ár páterdiń aýdany 43 sharshy metr.
«Jastar 23 jasqa tolǵan soń jasóspirimder úıimen qoshtasady. Sol kezden bastap óz kúnin ózi kórýge týra keledi. Degenmen, birneshe jyl memlekettiń qamqorlyǵynda bolǵan balalarǵa derbes ómir súrý ońaı túspeıdi. Ortalyqtyń ashylýy jastardyń páter alýyna da septigin tıgizedi. Óıtkeni, olar páter jaldap, aqsha shyǵyndamaıdy», - dedi oblystyq bilim basqarmasynyń bólim basshysy Qaırat Aldajarov. 
Budan bólek, Memlekettik hatshy Eset batyr atyndaǵy olımpıada rezervi kolledjinde, sondaı-aq tek hokkeıshilerdi ǵana emes mánerlep syrǵanaý men short-trekten bolashaq chempıondardy daıarlaıtyn «Olımp» jańa hokkeı modýlinde boldy.
