Memlekettik hatshy: 2013 jyly «Qazaqstannyń 100 jańa tulǵasy» jobasyn júzege asyrý kerek

ASTANA. 22 aqpan. QazAqparat - 2013 jyly «Qazaqstannyń 100 jańa tulǵasy» jobasy júzege asýy kerek. Búgin Astanada memlekettik aqparattyq saıasattyń ózekti máselelerine arnalǵan keńeste QR Memlekettik hatshysy Marat Tájın osylaı málim etti.

«Bizdiń mindetimiz - bir kezderi qatelikpen ketken daǵdy men taptaýryn dúnıelerdi túzetý, jańa tarıhı oıdy qalyptastyrý. «Jańa tarıhı oı» degende biz bunyń bolashaqqa ǵana emes, ótkenimizge de negizdeletinin umytpaýymyz kerek. Óz tarıhymyzdy uǵynyp, sanaǵa sińiretin ýaqyt jetti. Bizge bul máseleni ózimiz úshin túısinetin ýaqyt ta jetti», - dedi M. Tájın.

Sonymen qatar, Memlekettik hatshy ult tarıhyn jańasha túsinýge salmaqty qadam qajettigin, bul úderiske qazaq zııalylaryn, onyń ishinde eń aldymen jas ǵalymdar men jýrnalısterdi, muraǵatshylardy tartýdyń mańyzdylyǵyn atap ótti. «Ulttyq biregeılikti tarıhı jetistikterdiń keremet mysaldaryn alǵa tartyp, kórsetýsiz nyǵaıtý esh múmkin emes. Bul rette 2013 jyly «Qazaqstannyń 100 jańa tulǵasy» jobasyn júzege asyrýǵa tıispiz. Onda el ómirindegi túrli sala qaharmandary oryn alsa ıgi. Óz eńbegi, talanty, kúsh-jigeri arqasynda qoǵamda syı-qurmetke bólengen, táýelsiz memlekettiń damýyna qomaqty úles qosqan azamattar az emes. Bular - Elbasy saıasatynyń arqasynda bıikti baǵyndyryp, jetistikke jetken azamattar. Buqaralyq sanany osyndaı sharapatty jandardy úlgi etý arqyly jumys istegenimiz jón. Qarapaıym tilmen aıtsaq, Qazaqstannyń jańa tulǵasyn óz qolymyzben qalyptastyrýymyz kerek. Bul ábden júzege asyrýǵa bolatyn mindet. Óıtkeni, Qazaqstanda 100 emes myńdaǵan laıyqty tulǵa bar», - dedi M. Tájın.