Memlekettik derekter bazasyna ózgeris engizgender sottaldy
NUR-SULTAN. QazAqparat – QR Ulttyq qaýipsizdik komıteti «E-Lıtsenzııalaý» memlekettik derekter bazasyndaǵy málimetterdi zańsyz túrlendirýge qatysy bar adamdardyń áreketin áshkereledi, dep habarlaıdy QazAqparat tilshisi.
Atap aıtqanda, Ulttyq qaýipsizdik komıteti «E-Lıtsenzııalaý» memlekettik bazadaǵy málimetterdi (Qazaqstannyń aqparattyq-kommýnıkatsııalyq ınfraqurylymynyń asa mańyzdy nysany) túrlendirý jolymen zańsyz lıtsenzııalar berýdiń qylmystyq shemasyn uıymdastyrǵan adamdar áreketiniń jolyn kesken.
Qylmystyq áreket belgilerin «Qazaqstannyń Kıberqalqany» júıesi sheńberinde qurylǵan «Ulttyq aqparattyq tehnologııalar» AQ jedel aqparattyq qaýipsizdik ortalyǵy tirkegen.
«Jedel-izdestirý is-sharalaryn UQK qyzmetkerlerimen birge «Memlekettik tehnıkalyq qyzmet» RMK jáne «Ulttyq aqparattyq tehnologııalar» AQ-nyń tehnıkalyq mamandary birlesip júrgizdi. Keshendi kompıýterlik-tehnıkalyq saraptamanyń nátıjesi boıynsha «E-Lıtsenzııalaý» memlekettik derekter bazasyndaǵy málimetterdi túrlendirýge qatysty kúdikti adamdardyń kinási tolyq dáleldendi», - dep habarlaıdy UQK-dan.
2020 jyldyń 10 aqpanynda Nur-Sultan qalasy Esil aýdandyq sotynyń sheshimimen sottalýshylar Qylmystyq kodekstiń 206-baby 2-bóligi 1-tarmaǵy (Aqparatty quqyqqa syıymsyz joıý nemese túrlendirý) boıynsha kináli dep tanylyp, árqaısysy 1 jyl merzimge bas bostandyǵyn shekteý túrinde jazalanǵan. Sondaı-aq aqparattyq-kommýnıkatsııalyq ınfraqurylymǵa baılanysty kvazımemlekettik sektor sýbektilerinde laýazym ıelený quqyǵynan 2 jylǵa aıyryldy.
Úkim zańdy kúshine endi.
