Memlekettik bıýdjetke 8 trln teńge tústi – Qarjy mınıstri
«Memlekettik bıýdjetke kirister 8 trln teńge somasynda tústi nemese jospar 104,7%-ke atqaryldy. Respýblıkalyq bıýdjetke kirister 5 trln 224 mlrd teńge somasynda tústi nemese jospar 101,4%-ke oryndaldy. Jalpy kirister boıynsha jospar 74 mlrd teńgege artyǵymen oryndaldy. Salyq boıynsha 65 mlrd teńgege atqarylmady, salyqtyq emes túsimder 140 mlrd teńgege artyǵymen oryndaldy», - dep atap ótti E. Jamaýbaev Úkimet otyrysynda.
Mınıstrdiń aıtýynsha, salyqtar boıynsha negizgi atqarylmaý somasy qosylǵan qun salyǵyna tıesili.
«Qosylǵan qun salyǵy boıynsha jospardyń atqarylmaý sebepteri: ótken jyldyń uqsas kezeńimen salystyrǵanda qosylǵan qun salyǵyn qaıtarýdyń 50% nemese 181,5 mlrd teńgege ósýi; «Elektrondy shot-faktýralar» aqparattyq júıesi derekterine sáıkes satý boıynsha aınalymdardyń 13,6% azaıýy. Negizgi azaıý taý-ken ónerkásibi salasyna tıesili, onda aınalymdar 2019 jylmen salystyrǵanda 41,6% nemese 8 trln teńgege azaıǵan; 2019 jyldyń 10 aıymen salystyrǵanda Qazaqstannyń úshinshi eldermen taýar aınalymynyń 14,3%, 2019 jyldyń 9 aıymen salystyrǵanda Eýrazııalyq Ekonomıkalyq Odaq elderimen – 11,6% tómendeýi», - dep túsindirdi mınıstr.
Sonymen birge, jospar paıdaly qazbalar óndirýge salynatyn salyq boıynsha 14 mlrd teńgege asyra oryndaldy. Negizgi sebep tústi metaldar óndirý kóleminiń ulǵaıýy bolyp otyr.
«Jergilikti bıýdjet kiristeri 111,3%-ke atqaryldy jáne 2 trln 811 mlrd teńgeni qurady. Jalpy jospar 285 mlrd teńgege asyra oryndaldy. Onyń ishinde salyqtar boıynsha - 269 mlrd teńgege. Barlyq óńirlerde kirister boıynsha josparlar asyra oryndaldy», - dedi Qarjy mınıstri.
