Memlekettik bıýdjetke 526 mlrd teńge somasynda kiris tústi – Qarjy mınıstri

NUR-SULTAN. QazAqparat – Búgin Úkimet otyrysynda QR Qarjy mınıstri Erulan Jamaýbaev bıylǵy qańtardaǵy memlekettik bıýdjettiń atqarylý kórsetkishteri men qarjylyq jaǵdaıdy baıandady, dep habarlaıdy QazAqparat tilshisi.

«Memlekettik bıýdjetke 526 mlrd teńge somasynda kiris tústi nemese jospar 116,1 paıyzǵa atqaryldy. Respýblıkalyq bıýdjetke 288 mlrd teńge somasynda kiris tústi nemese jospar 90 paıyzǵa atqaryldy. Kirister boıynsha jospar 32 mlrd teńgege oryndalmady», - dedi mınıstr.

Onyń aıtýynsha, salyqtar boıynsha oryndalmaýdyń negizgi somasy qosylǵan qun salyǵyna jáne korporatıvtik tabys salyǵyna tıesili.

Qosylǵan qun salyǵy boıynsha jospardy oryndalmaý sebepteri:

- 2020 jylǵy qańtarmen salystyrǵanda qosylǵan qun salyǵy qaıtarylýynyń 2,3 esege ósýi;

- «Elektrondyq shot-faktýralar» aqparattyq júıesi derekterine sáıkes, satý boıynsha aınalymdardyń 14 paıyzǵa azaıýy. Negizgi tómendeý taý-ken óndirý ónerkásibi salasyna tıesili, onda aınalymdar ótken jylǵy qańtarmen salystyrǵanda 29 paıyzǵa nemese 373 mlrd teńgege azaıǵan;

- 2020 jylǵy qańtarmen salystyrǵanda Qazaqstan Respýblıkasynyń úshinshi eldermen taýar aınalymy 22 paıyzǵa tómendeýi.

«Korporatıvtik tabys salyǵy boıynsha jospardyń oryndalmaýy 2021 jylǵy qańtarda 743 iri salyq tóleýshi boıynsha málimdelgen avanstyq tólemder somasynyń ótken jyldyń uqsas kezeńimen salystyrǵanda 38,1 paıyzǵa azaıýyna baılanysty», - dedi E. Jamaýbaev.

Onyń sózine qaraǵanda, jergilikti bıýdjetterdiń kiristeri 178,6 paıyzǵa atqaryldy jáne 239 mlrd teńgeni qurady. Jalpy jospar 105 mlrd teńgege, onyń ishinde salyqtar boıynsha 90 mlrd teńgege asyra oryndaldy.

Barlyq óńirlerde kirister boıynsha josparlar asyra oryndaldy.