Memlekettik bıýdjet shyǵystary shamamen 9 trln. teńgege jetti
ASTANA. QazAqparat - Aǵymdaǵy jyldyń 11 aıynda memlekettik bıýdjet shyǵystary 9 trln. teńgege jetti. Bul týraly búgin Úkimettiń selektorlyq rejimdegi otyrysynda QR Qarjy mınıstri Baqyt Sultanov málim etti, dep habarlaıdy QazAqparat.
«Memlekettik bıýdjet shyǵystary shamamen 9 trln. teńgege jetip, 20 paıyzǵa ósti. Ótken jyldyń kórsetkishterine qaraǵanda ıgerý qarqyny anaǵurlym jaqsy. Memlekettik bıýdjet boıynsha ıgerý ótken jylmen salystyrǵanda 0,5, respýblıkalyq deńgeıde 1,5 paıyzǵa jaqsy atqaryldy», - dedi Sultanov.
Onyń derekterine sáıkes, jergilikti bıýdjetter boıynsha ıgerý ótken jyldyń dál osy kezeńine qaraǵanda 0,5 paıyzǵa nashar boldy.
«Tutastaı alǵanda memlekettik bıýdjettiń shyǵystary 97, respýblıkalyq bıýdjettiki 98,2 jáne jergilikti bıýdjetterdiki 96,6 paıyzǵa atqaryldy. Jyldyń qorytyndylary boıynsha respýblıkalyq bıýdjettiń shyǵystaryn atqarý deńgeıi 98,6 paıyz sheginde kútilýde», - dedi ol.
