Memlekettik boryshtyń ІJÓ-ge qatynasy arta tústi

ASTANA. QazAqparat – 2023 jyldyń І toqsanynda Qazaqstannyń memlkettik boryshy ishki jalpy ónimge qatynasy 24,6%-dan 24,8%-ǵa artqan. Bul týraly Qarjy naryǵyn damytý jáne retteý agentiginiń resmı saıtyndaǵy esepte aıtylǵan, dep habarlaıdy QazAqparat tilshisi.

«2023 jylǵy 1-toqsanda borysh júktemesi birshama ósip, ındeks máni 0,14 tarmaqqa azdap ulǵaıýy baıqalady. Bul aldyńǵy toqsanmen salystyrǵanda memlekettik borysh pen úı sharýashylyqtary boryshynyń ІJÓ-ge qatysy óskenimen baılanysty. Bul rette joǵary paıyzdyq mólsherlemeler ulǵaıǵandyqtan, korporatıvtik jáne bólshek kredıt berýdiń ósý qarqyny baıaýlaıdy. Bul da borysh júktemesiniń ósýin baıaýlata alady», - dep jazylǵan esepte.

Eseptegi kestege súıensek, 2022 jyldyń ІV toqsanynda memlekettik boryshtyń ishki jalpy ónimge qatysy 24,6% bolsa, 2023 jyldyń І toqsanynda bul shama 24,8%. Al úı sharýashylyǵyndaǵy boryshtyń (ıpoteka nesıeleri, avtonesıeler, nesıe kartasy boıynsha qaryzdar men tabys salyǵynyń boryshy-red.) ІJÓ-ge qatysy byltyrǵy ІV toqsanmen salystyrǵanda artyp, 14,1% bolǵan.

Kesteden jyldyń alǵashqy úsh aıynda bankterdiń nesıe berý qarqyny aıtarlyqtaı báseńdegenin baıqaýǵa bolady.

Zańdy tulǵalarǵa berilgen nesıelerdiń ósý qarqyny 2022 jyldyń ІV toqsanynda 11,5% bolsa, 2023 jyldyń І toqsanynda 6,3%-ǵa túsken.

Al jeke tulǵalarǵa nesıe berý qarqyny 2022 jyldyń ІV toqsanynda 31,8% bolsa, 2023 jyldyń І toqsanynda 28,5% bolǵan.