Memlekettik bilim berý jınaqtaý júıesiniń salymshylary 15 myńnan asty

ASTANA. QazAqparat - Memlekettik bilim berý jınaqtaý júıesi salymshylary 15 myńnan asty. Bul týraly QazAqparattyń resmı saýalyna jaýap bergen QR Bilim jáne ǵylym mınıstrligine qarasty Qarjy ortalyǵynan málim etti, dep habarlaıdy QazAqparat.

«Búgingi tańda memlekettik bilim berý jınaqtaý júıesi boıynsha salymshylar sany 15500 adamǵa jetti. Al salymdardyń somasy shamamen 7,7 mlrd. teńgeni quraıdy», - delingen jaýapta.

Sonymen qatar ortalyq bilim berýdi qarjylandyrýdyń eki balama kózin usynatyndyǵyn atap ótken.

Birinshisi bilim berý kredıtterin kepildendirýdiń memlekettik baǵdarlamasy. Memlekettiń kepil bolýymen beriletin bilim berý nesıesin talapkerlerge barlyq oqý úlgisi boıynsha, onyń ishinde magıstratýra úshin de alýǵa bolady. Qazaqstannyń barlyq joǵary oqý oryndarynyń stýdentteri de bul nesıeni rásimdeýge múmkindigi bar. Qazirgi ýaqytta bul baǵdarlamany paıdalanǵan stýdentter sany 3 myńnan asady.

«2005 jyldan beri bilim berý nesıeleý kepildendirý baǵdarlamasy boıynsha 3296 stýdentke 7 myńǵa jýyq kepildik berildi. Olardyń ishinde 688 kepildik boıynsha defolt boldy», - deıdi ortalyqtan.

Ekinshisi, memlekettik bilim berý jınaqtaý júıesi. Bul baǵdarlama ózińizge ne bolmasa balańyzdyń atyna keleshekte Qazaqstanda jáne shetelde joǵary ne joǵary oqý ornynan keıingi (magıstratýra) bilim alý úshin paıdalanýǵa bolatyn bilim berý jınaqtaý salymyn ashýǵa múmkindik beredi. Sonymen qatar salymshynyń bilim berý jınaqtaý salymynda oqý aqysyn tóleýge qajetti somanyń jartysy jınalǵan jaǵdaıda oǵan Qarjy ortalyǵynyń kepil bolýymen jeńildikti sharttarmen bilim berý kredıtin alýǵa bolady.

«Búgingi kúni oqý aqysyn tolyq tóleýge qajetti somanyń teń jartysy jınalýyna baılanysty nesıe resimdeý boıynsha ótinish ázirshe túsken joq», - deıdi ortalyqtan.