Memlekettik bilim berý jınaqtaý júıesiniń salymdary 12 mlrd teńgege jetti
ASTANA. QazAqparat - Memlekettik bilim berý jınaqtaý júıesi týraly zańǵa engizilgen ózgerister birqatar mindetterdi sheshýge baǵyttalǵan, dep habarlaıdy QazAqparat.
Eske sala ketsek, 5 shildede Memleket basshysy Nursultan Nazarbaev «Qazaqstan Respýblıkasynyń keıbir zańnamalyq aktilerine Memlekettik bilim berý jınaqtaý júıesi máseleleri boıynsha ózgerister men tolyqtyrýlar engizý týraly» Qazaqstan Respýblıkasynyń Zańyna qol qoıdy .
«Qarjy ortalyǵy» AQ-nyń túsindirýinshe, atalmysh zań áleýmettik baǵdary bar maqsatty - memlekettik qarjy quraly retinde MBJJ-ny damytýdyń zańnamalyq negizin jetildirýdi usynady jáne myna mindetterdi sheshýge baǵyttalǵan:
1. Memleketten 7% mólsherinde kótermelengen syılyqaqyny alýǵa quqyǵy bar jetim balalardyń jáne ata-anasynyń qamqorlyǵynsyz qalǵan balalardyń sanyn arttyrý;
2. Barlyq oblys ortalyqtarynda jáne Astana men Almaty qalalarynda mindetti túrde fılıaldarynyń bolýy týraly talapty alyp tastaý arqyly MBJJ-ǵa qatysýshy bankterdiń qataryn keńeıtý;
3. Aldyńǵy kezeńder úshin memleket syılyqaqysyn esepteý, sondaı-aq artyq eseptelgen memleket syılyqaqysyn qaıtarý múmkindigi;
4. Salymshynyń kez kelgen borysh túrleri boıynsha memlekettik bilim berý jınaqtaý salymyna túsken memleket syılyqaqysyn aktseptisiz esepten shyǵarýdy shekteý bóliginde normatıvtik quqyqtyq aktilerdiń normalaryn sáıkes keltirý.
MBJJ halyq arasynda úlken qyzyǵýshylyq týdyrýda. Salystyrmaly túrde alǵanda, bul qarjy quralynyń jańadan ashylǵanyna jáne bilim berý jınaqtaý salymdary tek 2013 jyldan ǵana ashyla bastaǵandyǵyna qaramastan qazirgi ýaqytta áreket etetin salymdardyń sany 16 myńǵa jýyqtap, olardyń jalpy somasy 12 mlrd teńgege jetti.
Naryqtyq ekonomıka jaǵdaıynda aqyly bilim alýdyń joǵary jáne kásiptik bilim berý salasynda alatyn úlesi zor, al bul oqýǵa qarajat jınaqtaý mádenıetin qalyptastyrýdyń mańyzdylyǵyn ózektendire túsedi.
