Memlekettik bilim berý jınaqtaý júıesi arqyly bilim alýdy memlekettik qoldaýdyń jańa tetigi enedi
ASTANA. 13 jeltoqsan. QazAqparat - Memlekettik bilim berý jınaqtaý júıesiniń negizgi maqsaty - kásiptik-tehnıkalyq, joǵary jáne joǵary oqý ornynan keıingi bilim alýǵa memlekettik qoldaýdyń jańa tetigin endirý. Búgin QR Parlamenti Senatynyń jalpy otyrysynda «Memlekettik bilim berý jınaqtaý júıesi týraly» zańy boıynsha baıandaǵan Bilim jáne ǵylym mınıstri Baqytjan Jumaǵulov osylaı málim etti.
Mınıstrdiń aıtýynsha, atalǵan qujat álemdik tájirıbelerge súıene otyryp ázirlengen. Onyń sózine qaraǵanda, mundaı bilim berý jınaqtaý júıesi Belgııa, Kanada, Malaızııa, Nıderlandy, Sıngapýr, Ispanııa, Shvetsııa, Ulybrıtanııa, AQSh sekildi memleketterde bar. «Mundaı shottarda qarjy jınaýǵa memleket jeńildikter men sýbsıdııalar berý arqyly qoldaý kórsetedi. Jalpy, elimizdegi bilim alýǵa qoljetimdilikti qamtamasyz etý 2 mehanızmmen atqarylyp kelgen bolatyn. Bunyń birinshisi - memlektetik granttar. Qazirgi tańda stýdentterdiń tórtten biri granttar arqyly oqıdy. Ekinshisi - memleket kepildik beretin bilim berý kredıtteri. Osy ekeýine qosa endi Memlekettik bilim berý jınaqtaý júıesi engizilgeli otyr. Ol birinshiden, halyqqa balalaryn oqytý úshin qarjy jınaýyna jeńildik jasaıdy. Ekinshiden, oqýǵa jumsalatyn shyǵyndardyń bir bóligin memleket óz moınyna alady», - deıdi Baqytjan Jumaǵulov. Mınıstrdiń sózine qaraǵanda, atalǵan júıe boıynsha Qazaqstannyń kez kelgen azamaty salymshy bola alady. Sosyn osy baǵytta ashylǵan arnaıy shotqa salymshynyń ózi nemese basqa da tulǵalar qarajat aýdara alady. Olar ata-ana nemese týystary bolýy múmkin. Zań jobasynda olardyń sheńberi shektelmegen.
